1Mama Kuurrnga-rna marninypungama. Kurrurntutarrartu-rna Mama Kuurrnga marninypungama.
2Turlku yinkarra-rna Mama Kuurrnga marninypungama. Marninypungkulayilku-rna ma-mirrirriku.
3Kulilku-kurlu-yan mula-mularriku wati-ya puurrpa nyinarranyangka. Wanti-ya. Tjiinyanta-ya yarnangulu wankalkitjamunu.
4Tjiinya-ya mirrirringkulalpi marlaku mantarriku. Nyangka ngarnmanymara-ya watjaranytjanya yutirrikitjamunu.
5Mama Kuurrnga tjiinya Tjayikapalu pupakatirra marninypungkulanytja, palunyalu-lanya yirringkankupayi tjiinya-lan mula-mularringkula kuliranyangka. Nyangka palunyalanguru-la walykumunu nyinama.
6Mama Kuurrtu manta yilkari puru kapi purlkanyatarrartu palyarnu, puru kutjupa-kutjupa mantangkatja yilkaringkatja kapingkatjatarrartu nyinarranytjanya. Palunyalu watjarnu wantitjatjanulu tjukarurrulu palyalpayi.
7Mama Kuurrtu-tjananya yarnangu mungutja pirni yirringkankupayi kutjupalu-tjananya kurrara kanyiranyangka. Palunyalu nungkumunu pirniku mirrka nintilpayi. Mama Kuurrtu tjayilpangka nyinarranytjanya walatjunkupayi.
8Palunyalu kurutjarra pirninya kuru yarlalpayi. Nyangka-tjinguru kutjupanya punkannyangka Mama Kuurrtu katura katirrayilpayi. Palunyalu yarnangu nyarra tjukarurru-ya nyinapayinya mukulyanytjulu kanyilpayi.
9Mama Kuurrtu maliki pirninya miranykanyira kanyilpayi ngurra kutjupanguru-ya pitjangu nyinarranyangka. Puru Mama Kuurrtu-tjananya yirringkara kanyilpayi tjiinya-ya minyma parnaltji puru tjilku wangulyara nyinarranyangka. Palunyalu yarnangu nyarra palyamunu pirninya wiyalpayi.
10Nyangka Mama Kuurrnga puurrpa purlkanya tirtu nyinaku nyinama. Yarnangu pirni, ngurra ngaa Yitjurayilta-yan nyinarra, kulila-ya. Mama Kuurrnga, tjiinya-yan pupakatirra marninypungkupayinya puurrpa purlkanya tirtu nyinaku nyinama. Nyangka-ya Mama Kuurrnga tirtu marninypungama. Yuwa, palunya.
