Tukpɔɠaaleʋe Nuiti 11:20-39

²⁰Kɛlɛ Siɠon la ɠɛni wola laani Izelayɛle la, é ʋa va bu ga naa ʋa leʋe ná-zooi zu. É ná-nuɓusɛiti kpein gaalɛɛni ba, ti ti ɓɔun Yaɠase, ti kɔɔi ʋɛɛ ti ʋa.

²¹«Ɠɔoɠɔ GALAGI, Izelayɛle ná-GALAGI, Siɠon ta ná-nuɓusɛiti dɔɔni Izelayɛle yeezu, é pilɛ sɔlɔɔ ti ma. Izelayɛle zooi kpein soni, ʋɛ Amɔɔl nuiti ti ɠɛni ná.

²²Ti Amɔɔl nuiti ta-yooi kpein soni, é zo ziɛ wolai Aalenɔn ma, eyɛsu é zeeli ziɛ wolai Yaɓɔke ma, é zo teʋebai ma, é zeeli Zuludɛn ma.

²³«Niizu niina, ni Ɠɔoɠɔ GALAGI, Izelayɛle ná-GALAGI, Amɔɔl nuiti kpɛa ná-nuɓusɛiti Izelayɛle luɠɔ, ɗa pɔ è ti ɓɛ ná ɓaa?

²⁴Nii nɔpɛ ɗa-ɠalagi Kemɔse feezu è ya ga è so, è la naa zoga ɓaa? Nii kpein Ɠɔoɠɔ GALAGI, gá-ƓALAGI seizu gi luɠɔ ga gi seɠe, gi la naa zeɠea ɓaa?

²⁵È vizɔgɛ mu Ɓalake ʋa ɓaa, Sipɔɔl ná-doun zunui, Moaɓe masagi? É Izelayɛle zakpeni nɛi ɓaa, ɓaa é kɔɔ ʋɛɛni ba?

²⁶É ɠɛa ga kona unsaʋagɔ (300) Izelayɛle zeini Ɠɛseɓon, ta Alɔwɛɛl, ta taaiti ti ɠiliai ti ʋa, ta taa wolaiti kpein ti ziɛ wolai Aalenɔn laaʋɛ. Leeni vaa zu wo la ɠɛni ti ɠulani ti ya naama ziɛgi zu?

²⁷Nɔ̀un nà, gè la kotoba vaa nɔpɛ kɛɛni è laalɔɠɔma, ɗa ɠa è faa ɲɔi ɠɛɛzu ga ze, è kɔɔi ʋɛɛ vai nɔ̀un ba. Ɠɔoɠɔ GALAGI, tukpɔɠaaleʋe ƓALAGI, ɠɛ za ga tukpɔɠaaleʋe nui Izelayɛle nuiti ta Amɔn nuiti zɔɠɔzu!»

²⁸Amɔn nuiti ta-masagi la ɠɛni woiloni naama wooiti ma, niiti Zɛfetee ɠɛni ti wosu ma.

²⁹Naazu ʋɛ, Ɠɔoɠɔ GALAGI ná-Zɛnvui yeini Zɛfetee ma, é Galaade ta Manasee yooiti maazuɓudɛni, é leʋe Misepa Galaade yooi zu, seɠeai ma miná, é liini luɠɔ, é laalɛ Amɔn nuiti bu.

³⁰Zɛfetee minazeɠeni Ɠɔoɠɔ GALAGI ʋɛ, é ɠɛ: «Ni gaamazu ɗa zobo feena bɛ̀, gè pilɛ sɔlɔɔ Amɔn nuiti ma,

³¹nà nu mɔungi naa ve è ʋɛ, gè kula ga gala zalaɠai, nii a ɠula nà-pɛlɛi wu, é ʋa dàaɠomisu, nà zobo sɔlɔɔna Amɔn nuiti ma kɔɔi zu, gè ɠale ma.»

³²Zɛfetee leʋeni é li Amɔn nuiti daalɔɠɔma, é kɔɔi ʋɛɛ ti ʋa, Ɠɔoɠɔ GALAGI ti lɔɔni zeezu.

³³É ti wola zuɠoloɠoloni taa wola ʋuufelegɔ (20) zu, é zo Alɔwɛɛl, Minite ʋele, eyɛsu é zeeli Aɓɛle-Kelamime. Amɔn nuiti ti ɠoloni Izelayɛle nuiti bɛ.

³⁴Zɛfetee ɠaleni ma ʋolu ná-pɛlɛi wu Misepa. Wɛlɛ, ná-doun anzanui ɠa é ɠulani, é daaɠomi ga tamadegiti ta kua wo faiti. Ná-doun ɠila kpegi ɠɛni de, zunu loun la ɠɛni zea, ɓaa anzanu loun.

³⁵É kaani nɔ feya, é ná-seɠeiti balini ga, é ɠɛ ma: «Ee, dòun anzanu! È kpɔ̀lɔa, ɗa màanɔɠɔ nuiti saama! Gè minazeɠe bogɛ Ɠɔoɠɔ GALAGI ɠaazu, gè la zeɠea nà-minazeɠei ʋolu.»

³⁶É ɠɛni ma: «Kɛ̀ɛ, ni è minazeɠe boga, Ɠɔoɠɔ GALAGI ɠaazu, nii kulaai è laaʋɛ, è bo, naa ɠɛ ga ze, niizu Ɠɔoɠɔ GALAGI ɗɔnɔ ʋotokula è zili nuiti ma, Amɔn nuiti.»

³⁷É ɠɛni kɛɛɠɛ ma: «Faa ɠila ka gè falizu è ma, è kɛ bɛ̀, alu felegɔ ve bɛ̀, gè li ga bɔ̀ɔlaiti gizei ma, gi nà-kpea wɔlɔi wo.»

³⁸Zɛfetee gooɠaaʋoteni, é ɠɛ ma: «Li!» É valini ma ga alu felegɔ. É liini gizei ma, ta bɔɔlaiti, ti ná-kpea wɔlɔi wo.

³⁹Alu felegɔi ʋoluma, é ɠaleni ma kɛɛɠɛ ʋɔ bɛ, naama ge ná-minazeɠegi laazeelini la. É la ɠɛni dɛ zunu vaa ɠwɛɛ. Naama yeei ɠa ma lɔgi zeini la Izelayɛle zaama ga,