Tjakultjurinkunytja 2:34-46

³⁴Mayutju Tapita paluru Katutjaku wangka kutjupa wakaṉu yalatji, ‘Katutjalu ngayuku mayutjungka watjaṉu Kurayitjanya tjungupula nyinanytjaku. Piyuku watjaṉu yalatji, “Ngayulu tjananya marrkulku nyuntulamarra, kuya tjuṯangkunta pungkutjipingka. Palumpa tjanampa nyuntu mayutjulpi nyinamalpa.” ’ Wangka palunya Tapitalu yalatji watjaṉu Kurayitjanya Katutjala tjungu nyinanytjaku. Wiya Tapitanya ilkarikutu kaḻpangu Katutjalawana nyinakitja, Kurayitjanya kutju.”

³⁶Piyuku Piitalu tjananya watjaṉu, “Nyurrangarri, Yitjurilaku ngaṉṯitja kutjupa tjuṯaṯarra nintirrinytjaku yalatjiku. Yilta Katutjalu Yiitjunya panyapa, mayutju tiṉa nganampa nyinatjunu. Paluru Kurayitjanya nyinanyi, Katutjalu nyinatjunutja. Nyurrangarri, Yitjurilaku ngaṉṯitja kutjupa tjuṯangkuṯarra palunya mungutjakutjura kulira watjaṉu tjana watiyangka nyiiḻamilara yiluntankunytjaku.”

³⁷Wangka palunya yaṉangu tjuṯangku kulira tjuni kuyarringu aḻṯururringkula Yiitjuku. Paluru tjana Yiitjuku waarrkana tjuṯa tjananya yalatji tjapiṉu, “Walytja tjuṯa, nyaarringkula?”

³⁸Piitalu tjananya watjaṉu, “Nyurrangarri kuya palyalwiyangku wantirra Katutjaku tjukarurru nyinama! Yankulanyurra Yiitjuku walytja tjuṯangka ngarama!, tjana nyurrangarrinya papatatjimilantjaku. Tjana papatatjimilalkitjangku yalatji watjalku, ‘Yiitju Kurayitjanya nyuntupa mayutju nyinanyingka ngayuluṉanta papatatjimilaṉi.’ Yalatji nyurrangarri tjukarurru nyinarra papatatji mantjintjala, Katutjalu kuya nyurrangarrimpa waṉiku. Palulanguru nyurrangarrilalpi palumpa kurrunpa paluru tjarrpatjunku.

³⁹Katutjalu yirriṯi watjaṉu, palumpa kurrunpa nyurrangarrila tjarrpatjunkukitjangku, nyurrangarrimpa katja tjuṯangka yuṉṯalpa tjuṯangkaṯarra. Katutjalu yaṉangu kutjupa kutjupa ngurrara tjuṯa nintinmalpa tjana palumpa walytjarrinytjaku. Palunya tjuṯangkaṯarra paluru palumpa kurrunpa tjarrpatjunku.”

⁴⁰Piitalu tjananya yaṉangu tjuṯangka yara kutjupa tjuṯaṯarra nintiṉingi. Palulanguru paluru tjananya piyuku watjaṉu, “Kuwarriya yaṉangu tjuṯangku kuya palyara nyinanyi. Yalatji kuya palyalpayi tjuṯa tjananya Katutjalu mirritjunkula warukutu iyalku. Yalatjingkamarra nyurrangarri tjukarurrulpi Katutjaku nyinanytjaku.”

⁴¹Yaṉangu tjuṯangku tjirri tjawutjunangku Piitaku wangka kulira tjapintjala, Yiitjuku walytja kutjupa tjuṯangku tjananya papatatjimilaṉu, tjiṉṯu palula.

⁴²Palulanguru Yiitjuku waarrkana tjuṯangku paluru tjananya Katutjaku wangka nintiṉingi. Paluru tjana tjiṉṯu kutjupa tjiṉṯu kutjupangka tjungurringkupayi nintirrikitja. Tjana yunypa tjungurringkupayi, pikapikarrinytjawiya. Tjana tjungurringkula Katutjanya rawangku waḻkulpayi, yuḻṯa puntuṯarraya ngalkura tjikilpayi.

⁴³Yiitjuku waarrkana tjuṯangku Yiitjukuṉu ngangkaritjarrangku miiṉṯa tjuṯa palyalpayi, mamu tjuṯaṯarraya payira wantirriyalpayi. Yalatjiya palyantjala yaṉangu tjuṯangku nyakula nguḻurripayi yalatji kulira, “Tjana nganaṉanya ngangkari puntutjarrangku tjinguru pungkuku.”

⁴⁴Yiitjuku walytja tjuṯa tjungurringkula palya nyinapayi, pikapikarrinytjawiya. Yulytjaku tjinguru maniku yinkanytjala tjana yungkupayi. Yalatji tjana ngaparrtjingku yungkula nyinangi.

⁴⁵Yiitjuku walytjarringkula tjana ngurra, waaḻaṯarra tjalamilara mani mantjira yungkupayi, maralpa tjuṯaku.

⁴⁶Tjiṉṯu kutjupa tjiṉṯu kutjupangka tjana yankula Tjuwuku tjaatji tiṉangka tjungurripayi, Katutjanya waḻkuntjaku. Tjaatjingka tjana nyinarra waaḻa kutjupa kutjupakutuya yankula nyinapayi, ngalkunytjaku. Ngurra palula tjuṯangka tjana yuḻṯa puntungka yunypangku ngalkura tjikilpayi, yalatji kulira, “Nganaṉa Yiitjuku walytja tjuṯa tjungurringkula yunyparringanyi palunya waḻkulkitja.”