Tjakultjurinkunytja 24:6-21

⁶Tjarutjalumala paluru nganampa Tjuwu tjuṯaku luwu kilytjuntanu yaṉangu Tjuwuwiya tjaatji tiṉangka tjarrpatjunkula. Nganampa luwu kilytjuntananyingka, nganaṉa palunya witira katingu tjaatjingka yaatjayiṯi.

⁸Palatja tjapila! Palurunta tjakultjunkunytjala nyuntu kulira ninti nyinaku, nganampa wangka tjukarurru yalatji ngaranytjala.”

⁹Tjuwu kutjupa tjuṯangkuṯarraya watjaṉu, “Yuwa. Tataliyatjanya tjukarurru wangkangu.”

¹⁰Mayutju Pilikitjilu marangku Puulanya nintiṉu, paluru wangkanytjaku. Puulalulpi watjaṉu, “Yunyparringanyiṉa nyuntu kuutawutjuku mayutju palya nyinanytjala. Nyuntu yirriṯi kuutawutjuku mayutju nyinarra kutu nganampa wangka kulira tjukarurru watjalpayi. Nyuntu kuwarri ngayuku wangka kulintjaku nyinanyingka ngayulu yunypa nyinanyi.

¹¹“Mungaṯu tjiṉṯu tuwalpala ngayulu tawunu Tjarutjalumala tjarrparra nyinangu, Katutjanya waḻkulkitja. Yalatji ngayuluṉanta tjukarurru watjaṉi. Nyuntu yunytjurringkula kutjupa tjuṯa tjapintjaku, tjana nyuntunya watjalku ngayulu Tjarutjalumala tjiṉṯu tuwalpalangka tjarrpangutjangka.

¹²Ngayulu ngurra palula palya nyinapayi yaṉangu kutjupangka wangkarra pikarrinytjawiya. Tjaatji tiṉangka ngayulu palya nyinapayi. Tjuwuku tjaatji tjuṯangka ngurra kutjupa tjuṯangkaṯarra ngayulu wiya yaṉangu tjuṯa tjaarramapiṉu, wiya. Ngayulu wiya Tjarutjalumanya ngurrara tjuṯa tjaarramapiṉu, wiya. Mayutju pala tjuṯa yalatjiku ninti nyinanyi.

¹³Tataliyatjalu pala tjuṯangkuṯarra wangka palunya ngunytji watjaṉu, puṯuya kuliṉi tjukarurru tjakultjunkukitjangku. Ngayulu ngurra palula wiya kuya palyalpayi.

¹⁴Tjana yalatji tjukarurru watjaṉu, ngayulu Yiitju Kurayitjanya waḻkura nyinapayi. Tjana kuliṉi ngayulu palunya wiyawanangku waḻkuṉingka. Muutjalu, Katutjaku wangka watjalpayi tjuṯangkuṯarra wakaṉu wangka Kurayitjanyatjarra. Tjanampaṉu wangkaku ngayulu tjukarurru nyinanyi.

¹⁵Mayutju ngaa tjuṯangkulatju tjungungku yalatji kuliṉi, yaṉangu tjuṯa mirringuru kanarriku, Katutjaku walytja tjuṯa, kuya palyalpayi tjuṯaṯarra.

¹⁶Katutjalu ngayunya ngula watjaltjipingka ngayuluṉa palumpa kutu tjukarurru nyinapayi, yaṉangu tjuṯakuṯarra ngayulu tjukarurru nyinapayi, ngunytjinytjunkunytjawiya.”

¹⁷Puulalu tjananya kuutawutjungka piyuku watjaṉu, “Tawunu kutjupa tjuṯangka ngayulu rawa nyinangi, yiiya tjuṯa. Yalatji waṉma nyinarra ngayulu Tjarutjalumalakutu yankula tawunu palulalpi piyuku tjarrpangu, ngayuku walytja maralpa tjuṯa mani yungkukitja, Katutjaku tjawirrilyiṯarra tjunkukitja.

¹⁸Yurrunpa ngayulu tuḻku palyaṉingi, Muutjalu irriṯi watjaṉutjangka. Katutjaku tjawirrilyi ngayulu katirra tjaatji tiṉangka tjunkunytjala Tjuwu tjuṯangku ngayunya nyangu. Ngayula wiya yaṉangu tjuṯa tjungurringkula ngarangi, yaṉangu kutjupa wiya ngayuku pikarringkula ngarangi, wiya.

¹⁹Tjuwu paluru tjana, manta Yayitjanya ngurrara tjuṯangku ngayunya nyangu. Paluru tjana kuutawutju ngaakutu ngalyanamara ngayunya kuru watjantjaku. Tjana ngalyankula tjukarurru watjanmara ngayulu ilta tjaatji tiṉa palula palya nyinapayi, kutjupa tjuṯa wiya ngayulu tjaarramapilpayi. Mayutju pala tjuṯangku wiya ngayunya tjaatji palula kurungku nyangu, tjana ngunytjiwanangku wangka palunya tjakultjunu.

²⁰Mayutju pala tjuṯangku ngayuku wangka kuliṉu ngayulu tjanala ngaranytjala. Tjana wiya watjaṉu yalatji, ‘Puulalu mayutju Yukatjatjaku luwu kilytjuntanu.’ Yalatji tjana wiya watjaṉu, ngayulu kuya palyantjawiyangka.

²¹Yalatji kutju tjinguru tjana watjalku. Mayutju tjuṯa miitingi palula nyinanytjala ngayulu raapangku watjaṉu, ‘Ngayulu kuliṉi Katutjalu yilta yaṉangu tjuṯa mirringuru pakaltjingalku. Yalatjiṉa kuliṉutjangka Tjuwu tjaampalatju pikarringu. Palulanguru tjuulytji tjuṯangkuṉi ngalya katirra ngaratjunu, kuutawutjungka.’” Yalatji watjara ngayulu wiya mayutju Yukatjatjaku luwu kilytjuntanu, wiya.