Aposol nup meme 24:6-21

⁶Yaŋön jöwöwöl jike mi mewöyök kapaŋ köla mem töwiba memba et almamgö ahök. Miaŋgöra nini i memba jöhöin. Nini keuŋi kewöta nanine Köna keu wuataŋgöba jim teköbingö mörin.

⁷(Mi mörinmö, suahö galöm bohonŋi Lisias yaŋön yarö azi yembuk kaba kukösum ketaŋi miaŋön könöpuk börönineyök meköba waŋgitket.

⁸Waŋgita keu sileŋe ala jim waŋgizei, i göhö jemesoholge kaŋgotmegöra jim kutum neŋgiyök.) Göŋön nangak qesim waŋginöŋga könaŋi indela jima. Mi jiiga keu memba kazini, miaŋgö ölŋi pakpak ölöp aukŋe asuhuiga mötman.”

⁹Mewö jiiga Juda ambazip yeŋön mewöyök “Keu pakpak mi ölŋa,” jiba imbi köla mi naŋgöba toroqeba sileŋe ala jim waŋgiget. Mewö.

¹⁰Pol jim waŋgigetka premiönöŋ keu jimapköra böröjöpaŋ kuŋguiga kewö meleŋda jiyök, “Göŋön (yara) yambu gwötpuk ambazip kambu kiaŋgö jimtekötekö toŋi aka malnöŋ mötzal. Miaŋgöra nöŋön keunaŋgö likepŋi mi göhö jege awösamkakak jimam.

¹¹Nöŋön uruwale Anutu waikŋi memba möpöseimamgöra Jerusalem sitinöŋ öŋgöyal. Mi wehön 12 miyök teköiga merak ki kinjal. Nangak qesim eŋgibanak ewö, mi ölöp naŋgöba jime.

¹²Nöŋön jöwöwöl jikenöŋ me köuluk miri kungen öŋgöba azi me ambi kunbuk goranora (noragora) keu jiba jitnakölik akiga mewö qahö miwikŋaim niŋgiget. Siti uruŋe köna me sombem kunöŋ ambazip uruŋini kuŋgubi ölököba liliköm niŋgigeri, mewö qahö neket.

¹³“Mewö qahö neka dölki keu silene ala jim niŋgizei, yeŋön miaŋgö ölŋi kondel gihibingö osize. Keu omaŋi jize.

¹⁴Mi osizemö, keu kun mi ölŋa jim miwikŋaim gihimam: Yeŋön Nazaret pati qetŋi qetzei, nöŋön mönö miaŋgö köna wuataŋgöba mala nanine ambösakonurup yeŋgöreŋ bem Anutu mi waikŋi memba möpöseimakzal aka Mosesgöreŋ Köna keu aka kezapqetok yeŋgöreŋ Buzup Kimbi miaŋgöreŋ keu ohoget ahözawi, mi pakpak möt narim köhöizal.

¹⁵Anutunöŋ ambazip diŋdiŋi aka goŋgoŋi mi körek pakpak mem gulim eŋgii kömupnöhök wahötmei, Juda azi kieŋön miaŋgöra mambötze. Nöŋön yembuk toroqeba öröröŋ kinda mewö asuhumapköra jörömqöröm aka mamböta maljal.

¹⁶Mewö mala Anutu aka ambazip jeŋine diŋdiŋi kinbiga Anutunöŋ keuni naŋgöba jiiga urunaŋgö kezapŋan mörakzal. Jönömnan qahö unduza. Mönö sarakŋi aka malmamgöra nalö dop kapaŋ köla köhöiba malakzal.

¹⁷“Nöŋön kungen malbiga (yara) yambu tosatŋi teköi liliŋgöba miri tosatŋi yeŋgöreŋök kalem memba uruwale kayal. Mewö kaba ‘Mi nani könagesöurup wanapŋi yeŋgöra mendeŋ eŋgimam,’ jiba Anutugö jöwöwöl ohoba naluk al waŋgimamgöra Jerusalem öŋgöyal.

¹⁸Miaŋgöreŋ öŋgöba köl könjörat ak aŋguba solanŋi mala jöwöwöl jikenöŋ öŋgöyal. Yuai mi ohoba Anutu al waŋgibiga miwikŋaim niŋgiget. Miwikŋaim niŋgigeri, miaŋgöreŋ ambazip tosatŋan qahö kaba liliköba ölököm niŋgiba göju meget.

¹⁹Juda ambazip tosatŋan Eisia prowinsnöhök kaba jikenöŋ öŋgöba nekeri, yeŋön mönö dölki göhö jege kiaŋgöreŋ kaŋgota kinda keu kun ahöm eŋgibawak, mi aukŋe silene ala jim niŋgigetka dop kölbawak.

²⁰“Me jike kaunsöl kambu yeŋgö jeŋine kinda keu jiali, mi wani Köna keu oŋgita pinjit akiga keu jakeŋe alalgö keuni miwikŋaiget? Azi ki tatzei, yeŋön mönö mi jigetka dop kölma.

²¹Nöŋön yeŋgö sutŋine kinda keu mohok-kun jiba töhöreŋ qetpiga lömböriyök. Köpösihit mewö kun ahal me qahö? Mi denöwö kewötket ahöza? Keu kewö qeta jial, ‘Kömukömuŋi yeŋön guliba wahötmei, nöŋön mewö möt narizalaŋgöra aka keu jakeŋe al niŋgigetka merak keuni kewöta jim teköm niŋgibingö akze.’” Mewö.