Föför 24:6-21

⁶A pwal sotuni an epwe apiningaua ewe Imwenfel, nge äm aia turufi. Äm aia ekiekin apwüngü fän pwüngün püsin äm kewe allük,

⁷nge ewe sounemenemen sounfiu Lisias a war o angei senikem fän pöchökül.

⁸Mürin Lisias a üreni, pwe ekewe chon atipisi ei mwän repwe feito me mwomw. Are en kopwe kapas ais ngeni ei mwän, kopwe tongeni silei seni i usun ekewe mettoch meinisin aia atipisi won.”

⁹Iwe, ekewe chon Juta ra tipeeu ngeni ekewe kapasen atipisi o üra pwe meinisin a let.

¹⁰Iwe, ewe kepina a pwome ngeni Paulus an epwe kapas. Iwe, Paulus a üra, “Ngang üa silei pwe en ka fen soukapwüngün ei mwü lon chomong ier. Iei mine üa pwapwa ai üpwe püsin peniei me mwomw.

¹¹Usun ka tongeni püsin silei pwe esap mwo lap seni engol me ruu rän ra la, pwe ngang üa feila Jerusalem ai üpwe fel ngeni Kot.

¹²Ekewe chon Juta resap küna pwe üa anini ngeni eman me lon ewe Imwenfel, resap pwal künaei pwe üa föri och mine aramas repwe fitikoko ren, sap lon ekewe imwen felikis ika ekis meinisin lon ewe telinimw.

¹³Resap pwal tongeni alletätä pwe a let ekewe kapasen atipisi ra aturuei won iei.

¹⁴Nge ngang üpwe pwärätä ei ngonuk: Üa fel ngeni än ach kewe lewo we Kot ren ai fetal won ewe Al ir ra apasa pwe mi mwäl. Nge üa pwal lükü meinisin mine a mak lon än Moses kewe Allük pwal lon ekewe puken soufos.

¹⁵Üa pwal apilükülük lon ewe Kot ir ra pwal apilükülük ngeni, pwe aramas meinisin, ekewe chon pwüng me ekewe aramas mi ngau, repwe manausefäl seni mäla.

¹⁶Iei mine üa achocho ngeni fansoun meinisin, pwe esap wor mengiringirin letipei me mwen Kot me aramas.

¹⁷“Mürin ai toau seni Jerusalem ekoch ier, üa liwinto ikei ai üpwe uwato moni fän iten alilisin aramasei kewe chon Juta mi osupwang, üpwe pwal uwato ai asor.

¹⁸Lupwen üa föri iei usun, ra künaei lon ewe Imwenfel, mürin ai awesi ai we angangen alimelim. Esap wor eu mwichen aramas a nom rei, esap pwal wor och fitikoko.

¹⁹Nge ekoch chon Juta seni ewe fanü Asia ra nom ikenan. Püsin ir repwe feito mwomw o pwärätä ar kapasen atutur are mi wor mine ra tongeni atipisiei won.

²⁰Ika ekei mwän mi nom ikei repwe pwärätä met sokun föföringau ra küna rei lupwen üa ütä me mwen ewe mwichen soupwüng,

²¹chilon chök ewe eu mettoch üa kökkö lupwen üa ütä me mwer, ‘Ngang üa küna kapwüng me remi ikenai fän iten üa lükü pwe ekewe sotup repwe manausefäl.’”