Moimai di vegu 24:6-21

⁶Ma ina ka Sei nivakena yava moi kino rigika reyo, makai dada moi gira reyafa.

⁸Ya kaya mina no fafau nikaitegiya vonisi, bi ini no nitourage resifa mina sina rama diba nigiya.”

⁹Mina sina niyo fafau, Jew vene yaku dabi risi niyadi, “Mina sina tau bi rama.”

¹⁰Kamini gavana yaku Paul rofu vana imiyou reyo ago niyanedi. Paul nikabai reyo, “Na na diba ya yaku lagani tau gade mina vene fafau kota reyo, ye na bi ada dudu beika na rofu niyadi fafau bi na kaya nigira regida.

¹¹Ye ya kaya veitao regiya: na bi meda 12 maka Sei nivakegi Jerusalem ri boyaka.

¹²Na bi Sei nivakena yavari amiye yokoi rofu kayamo de resi usa usa yavari o taoniri amiye moi kenoka de reyaka; Jew vene bi mina vegu de veyadi.

¹³Ma ina vene ka beika no na rofu nitourage reyadi bi moi rama aegi anua regedi.

¹⁴Mina resi, ya niokuda: na bi mina mokena vari gira aena Ida usi uni tutubena di Sei nivakeida, idu ina vene yaku nidedi mina Ida bi rama de vo nidedi. Ma Moses di ago girari ma Sei di ago niyadi vene di bura reyadi mina tau vakoi ka mokena vari gira aeda.

¹⁵Mina vene kana, na ka uka mokena Sei rofu moida bi yomini: amiye tau, mokena rorobo vene ma mokena vari gira de aededi venesa vakoi dadi rae regedi.

¹⁶Mina resi toga toga Sei ma amiye di nemokori uka di mokena rorobo dudu ka yeiva reida.

¹⁷“Lagani tau gade fufutari, mina resi Jerusalem ri nai vene di irava vene rofu fore gugura magi ma ori sisika regi dairiyaka.

¹⁸Makai regamakari, kino moi ruaka rina vegu reyaka fufutari, ina vene yaku Sei nivakena yava ideri na veitao reyadi. Nasa bi amiye tau de, ma amiye di varena amena moi siboroka bi de reyaka.

¹⁹Idu Jew vene bedakai Asia gagani gutuna bi mironari amegamadi; ini ago be na fafau vonisi, bi buni bi yi nemokori are resi nitourage rena ago nigedi.

²⁰O kaere gua minari, kanisoro vene di nemokori are reyakari, beika mokena rorobo de vegu reyaka ma veitao reyadi, mina niogau regedi.

²¹Idu na bi ago yokoi maka ini nemokori are resi nigira reyaka bi mini: ‘Muyena vene bi veguri dudusa dadi rae regedi, ya vene yaku na moi kota aeyadi, mina ago niyaka dada.’”