Tinata Valavalar 8:24-36

²⁴Di ga kava vaarike iau ba pata boko ra lamanana, Ma ra umana mata na tava ba dia buka ma ra tava, patana boko.

²⁵Ba pa di ga page boko ra umana ngala na luana, Ba pa ta buabuana boko di ga kava vaarike iau;

²⁶Ma pa i ga pait boko ra rakarakan a gunagunan ba ra pupui, Ba ra vunapai ra tobon i ra pia.

²⁷Ba i ga vatur mal ra bala na bakut, iau ga ki, Damana bula ba i ga valar vue ra lao ta ra ul a ta,

²⁸Ba i ga mal vapadikat ra maup arama liu, Ba i ga vapadikat ra umana mata na tava ta ra bala na pia,

²⁹Ba i a ga tul tar ra langun ta ra ta, Upi koko ra lavur polo diat a piam vue kana vartuluai, Ba i ga valar ra vunapai ra rakarakan a gunagunan,

³⁰Iau ga ki maravut ia da ra tena madaka; Ma i ga gugu vatikai tagu, Iau ga malamalagene vatikai ta ra luaina matana;

³¹Iau ga libur ta kana gunagunan ba ra tarai dia ki tana, Ma iau ga gugu ta ra umana natu i ra tarai.

³²Io, a umana bul, avat a valongore Iau, Tago diat dia mur kaugu lavur nga dia ti doan.

³³Avat a valongore ra varvateten, ma avat a minana, Ma koko avat a ole.

³⁴I ti doan nam ra tutana ba na torom tagu, Ba na mono ta kaugu mataniolo ta ra bungbung par, Ba na kiki pire ra tukal i kaugu matakilalat.

³⁵Tago nina i tikan tadav iau i tikan tadav ra nilaun, Ma na vatur vake ra varmari tai ra Luluai.

³⁶Ma nina i rara kan iau i vakaina ia iat mulai; Ma diat par dia milikuane iau dia mainge ra minat.