Tinata Valavalar 22:10-26

¹⁰Una okole vue ra tena varkulumai, ma ra varngangar na irop bula, Ma ra varpuapuai ma ra varvul dir a ngo.

¹¹Nina ba i manane ra gomgom na bala, Ma i kalakalami kana tinata, dir a talaina ma ra king.

¹²A mata i ra Luluai i vaale bat nina i kabinana, Ma i pukue vapurpuruan ra tinata kai ra tena vavagu.

¹³A tena talanguan i biti: Tika na leon i ki ra pia! Kan da ubu iau na nga!

¹⁴A ngie i ra enana vavina i da ra ngala na tung; Nina ba ra Luluai i kankanuane na bura tar tana.

¹⁵A mangamangana papaua i ki ta ra nuknuk i ra bul, Ma ra virit na vartovo na korot vavailik vue kan ia.

¹⁶Nina i ki taun ra umana luveana upi na vangala kana tabarikik, Ma nina ba i tabar ra umana uviana, na ki na niiba boko.

¹⁷A talingam uti, ma una valongore ra lavur tinata kai ra umana tena kabinana, Ma ra balam na ongor upi kaugu minatoto.

¹⁸Tago a magit na gugu ba u kodop vake diat ta ra balam, Ba dia ki na vaninara ta ra bul na ngiem.

¹⁹Gori iau tar vaarike diat piram iat, Upi una nurnur tai ra Luluai.

²⁰Dave, pa iau ga tutumu piram naria, Ure ra varvateten ma ra minatoto,

²¹Upi ina vakabara tuna u ta ra dovot na tinata, Upi una talil ma ra dovot na tinata tadav diat dia ga tulue u?

²²Koko una long pa ra magit kai ra luveana, tago i luveana, Ma koko una ki taun ra biaui ta ra mataniolo;

²³Tago ra Luluai na tata maravut dir ta ra varkurai, Ma na ra vue ra nilaun kadiat dia ra varpa pire diat.

²⁴Koko amur a talaina ma ra lup kankan, Ma koko amur a varait ma ra balakadik,

²⁵Kan una laure kana mangamangana, Ma una papa ta ra kun.

²⁶Koko tikai ta diat dia vavalima, Ba ta diat dia tur kia ure ra umana dinau.