Taha Bapare Sâcmutâc 26:31-36

³¹Ehame no hae sâkofâc‐ŋeŋic ima bacjopahuc nemufic‐ŋeŋic hetâtierâ wiac âsu biaŋ‐ŋeŋicte takicnuocmu.

³²Eme hae mâreŋ‐ŋeŋic imackepe râsifâc‐ŋeŋic jaŋe ira ŋec juc eniŋte fisi honerâ bipic tatara ejareocmu.

³³No qâpuc gurune gurune jaŋere ŋondeŋko bâtâtiec‐ŋopahuc ʒikazi ŋopa jâpec eŋarepe mâreŋ‐ŋeŋic tuhu fuaha hae sâkofâc‐ŋeŋic jaŋe niniŋ siarereŋ fuarâ fonʒepieŋ.

³⁴“Ŋoŋe râsifâc‐ŋeŋic jaŋere mâreŋko juhapie mâreŋ‐ŋeŋiczi niniŋ siarereŋ fuarâ foha sabata jara hombaŋ‐ticne maickeocmu, dameŋ ira hâcne mâreŋ‐ŋeŋiczi qoroc herâ fozejec.

³⁵Mâreŋ e niniŋ siarereŋ fuarâ foocmu iŋuc jaha qoroc herâ forahuc juzejec hâcne. Ŋoŋe mâreŋ ira juhuc sabata jara hombaŋ mi ŋembiŋte iŋuc mi fojujec.

³⁶Ʒanʒaŋnefâc‐ŋeŋic râsifâc‐ŋeŋic jaŋere mâreŋko juniŋmu jaŋe ejarepe maŋjeŋic gâckeme jâcrehac hâmocne mâŋâŋzi ficneme fânâŋkeme hâwic‐ŋopame wiseniŋmu, ine ŋic moczi ʒikare hâhâwicte wiseekac irec sâc wiseniŋmu hâcne, ehuc moczi moc jopa jâpec mi ejareha sifu waha jopaocmu.