Taha Bapare Sâcmutâc 26:2-12

²Ŋoŋe sabata hombaŋ‐nane ŋehuc furufic‐nane araŋ bacnenʒepieŋ. No hâcne Wofuŋ jukopac.

³“Ŋoŋe dâŋnane bajuhuc sâcmutâc dâŋnane mana rereŋ eniŋmuo

⁴ine mupe hoe i dameŋ‐ticnao heŋareocmu, ehame mâreŋzi nânâ wiac gume hesiwiŋ ecneocmu â jâc wiaczi wâc hândâŋ fârihec efâreocmu.

⁵Eme padi jacgoŋ bâmârâŋkehuc juhapie waiŋ roro dameŋ maickezejec, â waiŋ rohuc juhapie hesarac dameŋ maickezejec; iŋuc fuame nânâ wiac‐ŋeŋic nâ gapec ehuc mâreŋ‐ŋeŋicko juhâc qâhâmonʒepieŋ.

⁶Ehame noni wama bâfua‐ŋarepe ŋoŋe waha fohapie moczi moc hâhâwic mi heŋarezejec. Erâ no qowi mimicne mâreŋ‐ŋeŋickonec bârâriec‐jopahape ʒikazi mi maic‐ŋopazejec.

⁷Eme ŋoŋe râsifâc‐ŋeŋic jopa jâpec ejarepie jaŋe ʒikare micko fenʒepieŋ.

⁸Ŋoŋeraonec ŋic 5 jaŋe ŋic 100 jâpec‐jopahapie 100 jaŋe teŋ tauseŋ jâpec‐jopanʒepieŋ; ehame râsifâc‐ŋeŋic jaŋe ʒâŋe fai‐ŋeŋicko ʒikare micko feniŋmu.

⁹Eme no ehâmo‐ŋarehuc sâoc‐ŋopahape sawe mâririackenʒepieŋ, ehame ŋoŋehec ʒâʒâfic epo i basanaŋkepemu.

¹⁰Ŋoŋe nânâ rowaŋ raŋɋanaonec nâhuc junʒepieŋ, ehame nânâ ɋâricnere dameŋ maickeme raŋɋane bârâriepie ɋâricnere ŋeŋe fuazejec.

¹¹Eme no ŋondeŋ‐ŋeŋicko ŋeŋe juju epemu, ehame maŋ qâqâtâc‐nanezi mi suŋgiŋ‐ŋopazejec.

¹²Ehame no ŋondeŋ‐ŋeŋicko rac warec ehuc Anutu‐ŋeŋic juhape ŋoŋe ŋicfâc‐nane erâ junʒepieŋ.