Taha Bapare Sâcmutâc 23:12-19

¹²Fenʒoŋkeocmu ʒoaŋ ira ŋoŋe lama ŋicne biaŋne moc Wofuŋ bâzi rikecnenʒepieŋ.

¹³Ehuc taha bâzire biŋe wiac kecʒiŋuc ʒuhuckerâ Wofuŋ rikecnepie âsu biaŋ fuazejec: Poroŋ uucne wokemaŋhec bâsifuckekicne oto mocjahaonec teŋkonec jajahec â waiŋzi taha bâzi ine fifia râqâckonec nâfocne 4 irec sâc ʒuhuckenʒepieŋ.

¹⁴Erâ ŋoŋe nânâ poroŋ me jacgoŋ hâcbuc me sâŋsâŋ bakicne i mi nânâ mâc juhapie ʒoaŋ i hâcne maickezejec, ŋoŋe qanaŋ Anutu‐ŋeŋic taha bacnenʒepieŋ. Dâŋ izi hâcne ŋic gaŋne gaŋne fuarâ ŋeŋe juju eniŋmu sâc dâŋsanaŋ‐ŋeŋic erâ forahuc juzejec.

¹⁵“Ŋoŋe sabata hombaŋ tarame nânâ nânâsu dameŋko taha baparao nânâ wiac râepie fenʒoŋkeocmu, ʒoaŋ gie bapa irecnec fuŋkerâ jufekupie sabata hombaŋ 7 tarazejec.

¹⁶I tarame ʒoaŋ gie bapa 50 eha gie ɋârionec padizi taha bâzi Wofuŋ râcnenʒepieŋ.

¹⁷Ehuc oto mocjahaonec teŋkonec jajahec irec sâc poroŋ uucne rorâ goreŋhec bâsifuckerâ poroŋ jajahec rikepie tarame ficŋeŋickonec taha baparao bafisipie eki fenʒoŋkezejec. Poroŋ izi hâcne Wofuŋtao nânâ bâbâsu tinac ekac.

¹⁸Erâ lama biaŋne 7, jara‐jeŋic wâŋ ekicne, erâ bulimakao motecnezi ŋicne â lama ŋicne jajahec jaŋe poroŋhec tahare biŋe râec‐jopanʒepieŋ. Jaŋe hâcne Wofuŋtao qowi bâzire biŋe enʒepieŋ. Ehame taha bâzi â waiŋzi taha bâzi i ʒuhuckerâ rikepie Wofuŋte maio âsu biaŋ fuazejec.

¹⁹Ehame ŋoŋe sâqocne tâtâmire tahare biŋe noniŋ ŋicne moc, me wama bâzire biŋe lama ŋicne jajahec jara‐jekic wâŋ ekicne, iŋucne râec‐jopanʒepieŋ.