Taha Bapare Sâcmutâc 19:7-16

⁷Me ʒoaŋ jahec â moc eha sifu nâniŋmuo ine wiac mamakâcne eme Wofuŋzi mana‐ŋareme mi biaŋkeocmu.

⁸Moc e wiac i eocmuzi kiŋ hureocmu, e Wofuŋte wiac tirine irec maname wawahane ewecte. Ŋic iŋucne e âgofâcne jaŋere ŋondeŋkonec bâsirowezo.

⁹“Ŋoŋe padi wiac qa roro ehuc gie qaŋeŋnao doma rakac i mi rofârenʒepieŋ; â kisecne doma raocmu i wâc mi unucke‐fârenʒepieŋ.

¹⁰Waiŋ hândâŋne i iŋuc jaha furu mi bâtâcne‐fârenʒepieŋ, â mâreŋko waharâ fokac i wâc mi nusehuc ŋic hapetac â jabane jaŋere biŋe behepie fozejec. No Wofuŋ ŋoŋere Anutu hâcne.

¹¹“Ŋoŋe fiuc mi ronʒepieŋ â eeatuc ehuc burec eec wâc mi enʒepieŋ.

¹²Ŋoŋe nore ʒâŋeo ɋetickerâ mumupaŋ dâŋ burecne ehuc ʒâŋe‐nane mi bawahanʒepieŋ. No hâcne Wofuŋ jukopac.

¹³“Ŋoŋe ŋic âgofâc‐ŋeŋic bâʒâic‐jopahuc mafa wiac‐jeŋic mi jowac ronʒepieŋ. Kiŋaŋŋicfâc‐jeŋic jaŋere gie furi i bajuhapie hae mi furezejec.

¹⁴Ŋoŋe ŋic nâŋguŋne mi sâwec‐jopanʒepieŋ; â tiŋtiŋ jaŋere hata i aka mi henʒepieŋ, ehuc Anutu‐ŋeŋic ine araŋ bacnenʒepieŋ. No Wofuŋ jukopac hâcne.

¹⁵“Ŋoŋe ŋic dâŋjeŋic mutarahuc mi musifuckenʒepieŋ, ehuc ŋic waha qaqane araŋ mi bajarenʒepieŋ, â ŋic fekicne jaŋe wâc mi sâsec‐jopanʒepieŋ, aricne, ŋoŋe ŋic âgofâc‐ŋeŋic jaŋere dâŋ i sâcmutâc dâŋte sâcko mutara‐jarenʒepieŋ.

¹⁶Ŋoŋe ŋic âgofâc‐ŋeŋic micko âkec mi ejarenʒepieŋ â jaŋere dâŋgie bahuc juju‐jeŋic ba ima ezo mi munʒepieŋ. No Wofuŋ jukopac hâcne.