Taha Bapare Sâcmutâc 19:13-34

¹³“Ŋoŋe ŋic âgofâc‐ŋeŋic bâʒâic‐jopahuc mafa wiac‐jeŋic mi jowac ronʒepieŋ. Kiŋaŋŋicfâc‐jeŋic jaŋere gie furi i bajuhapie hae mi furezejec.

¹⁴Ŋoŋe ŋic nâŋguŋne mi sâwec‐jopanʒepieŋ; â tiŋtiŋ jaŋere hata i aka mi henʒepieŋ, ehuc Anutu‐ŋeŋic ine araŋ bacnenʒepieŋ. No Wofuŋ jukopac hâcne.

¹⁵“Ŋoŋe ŋic dâŋjeŋic mutarahuc mi musifuckenʒepieŋ, ehuc ŋic waha qaqane araŋ mi bajarenʒepieŋ, â ŋic fekicne jaŋe wâc mi sâsec‐jopanʒepieŋ, aricne, ŋoŋe ŋic âgofâc‐ŋeŋic jaŋere dâŋ i sâcmutâc dâŋte sâcko mutara‐jarenʒepieŋ.

¹⁶Ŋoŋe ŋic âgofâc‐ŋeŋic micko âkec mi ejarenʒepieŋ â jaŋere dâŋgie bahuc juju‐jeŋic ba ima ezo mi munʒepieŋ. No Wofuŋ jukopac hâcne.

¹⁷“Ŋoŋe qomâfâc‐ŋeŋic mi qaisoc‐jopanʒepieŋ, ŋoŋe jaŋere erâ kiŋ hurenʒipiŋte juju â eebapa‐jeŋic mutiŋnenʒepieŋ.

¹⁸Ŋoŋe okac babazu gie bahuc âgofâc‐ŋeŋic jaŋere kiŋ mi bajunʒepieŋ; ŋoŋe ŋaŋacnere eŋareekac sâc ijaha âgofâc‐ŋeŋic jaŋere eŋarezejec. No Wofuŋ jukopac hâcne.

¹⁹“Ŋoŋe dâŋsanaŋ‐nane mana rereŋ enʒepieŋ. Bulimakaofâc‐ŋeŋic jaŋe bulimakao fuŋne fuŋne jaŋehec sisifuc erâ mi junʒepieŋ. Ŋoŋe wiac ukicne jajahec gie‐ŋeŋicko mi tienʒepieŋ, â ŋaqi wiac‐ŋeŋic i qoruc hawarine jajaheczi bakicne mi rojunʒepieŋ.

²⁰“Ŋic moc e kiŋaŋ naru moc ŋic mocte biŋe qakicne e kiwiric‐ticne ropie rambaŋko mi juha bâsâqoreocmu ine dâŋgie fuazejec. Naru e rambaŋko mi juwecte mi qâhâmoc‐jofazo.

²¹Ŋic e kiŋ tatara taha Wofuŋ râcnezejec, ine lama ŋicne moc kiŋ tatara tahare biŋe tutumaŋ qoruc bozere motâcko hâcne râezejec.

²²Eme taha bapa e Wofuŋte maio lama ŋicne i kiŋ tatara tahare biŋe râehuc kiwiric‐ticne rozejec, eme sâqocne bawec i bâtâmirecnezo.

²³“Ŋoŋe mâreŋ biŋe qaŋarekicne ira fisirâ jâc fuŋne fuŋne sarapie fârine fuame mi nâhuc juhapie jara jahec â moc tarazejec. Iŋuc juhuc manapie muac‐nâpokicne ezejec.

²⁴Eme jara namba 4 ira fârine fuaocmu i Wofuŋ ʒeri mumuteŋ ecnehuc daŋge taha râecnenʒepieŋ.

²⁵Jara 5 ira ine nâ bac epie mâriri sâko fua‐ŋarezejec. No Wofuŋ ŋoŋere Anutu hâcne.

²⁶“Ŋoŋe qowi biuc socnehec mi nânʒepieŋ, ehuc faŋfaŋdâŋ muhuc qaŋgec mi banʒepieŋ.

²⁷Ŋoŋe naki‐ŋeŋic ŋifec â ŋifec susucne mi hezunʒepieŋ, â mecʒâwâ‐ŋeŋic tofane wâc mi bâtâcnenʒepieŋ.

²⁸Hâmoc fuame busâqocte sahac‐ŋeŋic mi hetâcnenʒepieŋ, â soqâreŋ wâc mi banʒepieŋ. No Wofuŋ jukopac hâcne.

²⁹“Go otâge bawahahuc sasec giere mi qikiŋnezemec, iŋuc etec sau gie â hehesiczi mâreŋ mi sâckezejec.

³⁰Ŋoŋe sabata hombaŋ‐nanere manapie tirine eha furufic‐nane araŋ bacnenʒepieŋ. No Wofuŋ jukopac hâcne.

³¹“Ŋoŋe bawe me faŋfaŋ wiac maic‐joparâ jaŋerao qohotahuc wâwânâŋhec mi enʒepieŋ. No Wofuŋ ŋoŋere Anutu hâcne.

³²“Ŋoŋe ŋic jaŋɋâŋhec jaŋerao faharenʒepieŋ, ehuc ŋicraŋɋa jaŋe sâsec‐jopanʒepieŋ, â Anutu‐ŋeŋic araŋ bacnenʒepieŋ. No Wofuŋ jukopac hâcne.

³³“Ŋic jabane moc e ŋondeŋ‐ŋeŋicko juhame mi bâʒâickenʒepieŋ.

³⁴Aricne, ere manapie mâreŋ rune tinac eha ŋoŋe ŋaŋacnere eŋareekac sâc ijaha ere eŋarezejec. Ŋoŋe Aigita mâreŋko jaba jaha jumbiŋte iŋuc enʒepieŋ. No Wofuŋ ŋoŋere Anutu hâcne.