Taha Bapare Sâcmutâc 16:2-29

²“Go hahacge Aroŋ e hâmozacte âzâcnetec tirificte ââketâc râpenao katapa tapanere maŋfuŋko dameŋ sâc mi warezejec, no ʒira hâcne karorac maŋko fuapemu.

³Aroŋ e tirificko wefuocte wiac kecʒiŋuc rorâ wefuzejec: Sâqocne tâtâmire tahare biŋe bulimakao motecnezi ŋicne moc â taha bâzire biŋe lama ŋicne moc, iŋuc rocjofarâ wefuzejec.

⁴Ehuc ŋaqi maŋne â kike ŋaqi heme hume umbikazi basanaŋkerâ du kakambuc mâmâc heme huzejec. Wiac izi gie ŋaqi tirine ekac, i hâcne opâ ruarâ heme huzejec.

⁵Erâ e Israe kikefuŋ jaŋeraonec noniŋ ŋicne jajahec sâqocne tâtâmire tahare biŋe rocjofahuc lama ŋicne moc taha bâzire biŋe rozejec.

⁶“Eme Aroŋ e jahacne â wiacfâc‐ticne jaŋere kiwiric roocte bulimakao i sâqocne tâtâmire tahare biŋe râezejec.

⁷Iŋuc erâ noniŋ jajahec rocjofarâ Wofuŋte maio tutumaŋ qoruc bozere motâcko râec‐jofazejec.

⁸Râec‐jofarâ moc Wofuŋte biŋe â moc Aʒaʒele nemure biŋe eocte ɋâsâi qazejec.

⁹Erâ Wofuŋte biŋe âke fuaocmu i sâqocne tâtâmire tahare biŋe râezejec.

¹⁰Aʒaʒelere biŋe âke fuaocmu i ine ɋâricne domahame Wofuŋte maio râehuc kiwiric rorâ mâreŋ burocnao Aʒaʒelerao ecneme razejec.

¹¹“Aroŋ e bulimakao i e jahacne â wiacfâc‐ticne jaŋere kiwiric roocte sâqocne tâtâmire tahare biŋe râezejec, ehuc e jahacnere wâc manasuhuc sâqocne tâtâmire tahare biŋe qâhâmozejec.

¹²Ehuc alata Wofuŋte maio ŋekac irecnec ʒoc kine gomba tâtâcko hezurâ hosâc âsure wiac uucne me jajahec fufusuc i ââketâc maŋnao bafisizejec.

¹³Erâ hâmozacte ʒoc ʒahuc fokac ira râeme hosâc âsure rombâŋzi qorac tapa katapa tapane sâckezejec.

¹⁴Ehame bulimakao soc gâcne rorâ meticnezi qorac tapa katapa tapane maŋfuŋnao â fainao tieme arec 7 ezejec.

¹⁵“Eme irec faicnao sâqocne tâtâmire tahare biŋe noniŋ moc ŋic jaŋere erâ qâhâmozejec, ehuc socticne ââketâc râpenao bafisihuc bulimakao soc tiewec irec sâc jaha ehuc qorac tapa katapa tapane fainao â maŋfuŋnao tiezejec.

¹⁶E iŋuc ehuc Israe ŋic jaŋe wâwânâŋhec â qaqatara erâ sâqocne‐jeŋic sasawazi tirific hegâpârembiŋ i bâtirizejec. Jaŋe wâwânâŋhec juhapie tutumaŋ qoruc bozere manasuhuc iŋuc hâcne ezejec.

¹⁷Aroŋ e jahacne me wiacfâc‐ticne â Israe ŋic jaŋere kiwiric roocte tirificko ferâ juhame ŋic moczi tutumaŋ qoruc bozemaŋko moc mi juzejec.

¹⁸Kiwiric rome tarame waharâ Wofuŋte maio alata ŋekac i bâtirizejec, ehuc noniŋ bulimakao soc gâcne rorâ alata ʒuŋene râreckehuc ruacnezejec.

¹⁹Ehame meticnezi soc gâcne tieme arec 7 eha Israe ŋic jaŋe alata hegâpârembiŋ i ʒure ɋaɋackehuc bâtirizejec.

²⁰“Eme tirific â tutumaŋ qoruc boze erâ alata irec bâbâtiri gie bame tarame noniŋ moc i tahare biŋe ɋâricne râezejec.

²¹Ehuc mejahec‐ticne noniŋ qizecnao râehuc Israe ŋic ŋokac jaŋere kiŋ bahac â qaqatara erâ sâqocne mutaniŋkezejec, ehuc noniŋte faio mume feha ŋic moc ʒawierâ jukac e hâcne soreme mâreŋ burocnao jowa razejec.

²²Eme noniŋ e kiŋ bahac fainao râekicne i de âsic erâ mâreŋ tuhu pectâcko fisime ŋiczi soreme mâreŋ burocnao ra juzejec.

²³“Eme Aroŋ e tirificko feocte ŋaqi hewec i tutumaŋ qoruc bozeo ferâ hetara ira râeme fozejec.

²⁴Ehame fic maŋne moc bâtirikicne ira opâ ruarâ gie ŋaqi‐ticne moc i heme hume waharâ e jahacne â ŋic jaŋere biŋe taha bâzi rikezejec, ehuc e jahacne â ŋic jaŋere kiwiric rozejec.

²⁵Ehuc sâqocne tâtâmire tahare wokemaŋ i alatao rikezejec.

²⁶Eme noniŋ Aʒaʒele nemurao jowac rawec ŋic e ŋaqi‐ticne ʒurerâ e jahacne wâc opâ ruarâ teuŋko raʒizejec.

²⁷Erâ socjekic bâbâtiri gie bazore tirificko bafekicne bulimakao â noniŋ i jahere fâri hae râpenao bacjofa hunʒepieŋ, ehuc sahac â biuc erâ hojekic ʒocko behepie ʒâtâmirezejec.

²⁸Eme wiac i rikeocmu ŋic e iŋuc jaha ŋaqi‐ticne ʒurerâ e jahacne wâc opâ ruarâ teuŋko raʒizejec.

²⁹“Eme dâŋsanaŋ kecʒiŋuc foŋarehuc juzejec: Ŋoŋe mosa namba 7 irec ʒoaŋ gie bapa 10 ira sowa juhuc ŋaŋacne mecne â ŋic jabane ŋondeŋ‐ŋeŋicko jueŋgopieŋ jaŋe mecne gie moc mi banʒepieŋ.