Tɛnɛ Faalaaliiti 31:6-26

⁶Nu gaazulati kpɔle anii ve naa ya, nii undaa ʋaazu ʋilisu, ta dɔɔi ve maawɔin nui ya.

⁷É kpɔle, é yeema ná-baladai ma, é mina ɠitoo ná-maanɔɠɔi zu.

⁸Laalao è ɓɔɛ, è naati maalobo, niiti ti la zooga ti ʋa ɓɔɛ, è naati kpein maalogi wo, niiti kɛlɛbai wogai ga tiye.

⁹Laalao è ɓɔɛ, è tukpɔi ɠaaleʋe ga telebodai, è maanɔɠɔi nui maalobo ta bala nui.

¹⁰Undaanɛɛ nu ɠa ga naa, nii a anzanu zɔɓelamai zɔlɔɔ, tosuʋɛ wɔɔlɔʋɛ kɔbu ani ʋagɔiti sɔngɔi ʋa.

¹¹Sinigi laaʋɛ da, ani ʋagɔ nɔpɛ ge la ʋalaga ná-pɛlɛi wu.

¹²É la ɗa ga kazemazu vaa nɔpɛ kɛ ga sinigi, kɛni faa ʋagɔi nɔ, sii ma voloiti pɛ su.

¹³Toɠa ɗa baala deɠai ɠaiziɛ ta gezei, é ɗa boti ɠɛ ga zeeiti ga koozunɛɛi.

¹⁴Eɠɛ yaaɠo ɓatoi, toɠa ɗa zeɠe ga ɠɔnɔgi ɠoozama.

¹⁵Toɠa ɗa wuzeɠe ga kpidiɓidigi, é daamianigi ve ná-pɛlɛyeɠei ya, é ná-deveiti fe ná-botiɠɛ anzanuiti zea.

¹⁶É ɠisiɛ kpalagi ta zu, é geya, é leezɛn ɓelei leʋe ba, ga ná-botii zulɔnɔgi.

¹⁷Toɠa ɗa botii ɠɛ ga suvikɛi pɛ, zea la ʋalaga ɠɔ.

¹⁸Toɠa pɛtɛsu ga zeavaiti su ɠa ɓɛtɛzu, toɠa ɗa ɠaazuɓa, é ɗa botii ɠɛ kpidii, abu zezei ɠa.

¹⁹Toɠa ɗa kenagi zo ga yeei, é ɗa gezei ɓali, é kena kpakui zo ga yeeɓeɠaiti.

²⁰Zeei maalegɛ maanɔɠɔ nuiti ta-ɓɔba vai ma, toɠa ga faanɛɛ ɠɛ nu bala nuiti bɛ.

²¹É la lua kɔɔlɛ ʋa, é ʋilɛ ná-pɛlɛi ʋa, tɔɔzei seɠe ʋagɔiti ta ti pɛ zea.

²²Toɠa ɗa dasuzeɠeiti kpɛtɛ tɔ ɓɔɠɔi, geze ɓɔi seɠeiti ta zea.

²³Sinigi ɠa ga seizumaanɛɛgi ɛsɛ pɛ ge kwɛɛ, ti ɗa unfe ma, tiya ɠa ta ɗa zei taa vaawo bosuʋɛti.

²⁴Toɠa ɗa seɠeiti fɛlɛ, é ɗa ti ʋɔdi, é ɗa saamaɠiligiti fe yaaɠoiti zea.

²⁵Zɛbɛi ta unfemai, ta bɛ ga maaɠili zɔɔlai, toɠa ɗa ɲɛɛ laa ɠakama, a ɠɛna ɠisiaa ʋelela ʋele vaiti su.

²⁶Toɠa ɗa ɓɔɛ ga ɠimalai, soogɛ kalagi wosu ga wooɠɛɠiladai.