Tɛnɛ Faalaaliiti 27:4-15

⁴Ziiɠaawanai ɲɔuʋɛ, ziiɠulagi ɠeeɠaaɓa, kɛlɛ ɓɛ ɠa a lo toloi luɠɔ?

⁵Fizɔgɛ è zelii lo nui ma kɛlɛi zu, è ʋa maaɠɛ kpɔ bɔɔla vai ma.

⁶Nu wɔɔlai ná-zelilomai, ɠa ná-wooɠɛɠiladai lɛɛzu, nu zili nui è nɛɛnɛ vai, naa ɠa ga yaava vaa nɔ.

⁷Ziɠo nui ɠa ɗa ɠɛlɛ kɔin gulɔi ʋa, pulu nui ɠa ɗa ani wanai ɠa ga ɲɛmigɛ.

⁸Siɛziɛ nui maa ɠa ɠoozana seizuʋɛ ʋa, kɛɛʋɛ eɠɛ wɔnii maaɠoozaai ná-daɠagi ʋa.

⁹Gulɔi ta gulɔ maku nɛɛnɛgi, ta ɗa nu yiiɠaanɛ, bɔɔla vai ná-gaanɛɛi ɠa ɗa koozunɛɛi ve nu ya, é leʋe ɗa ɓɔɠɔ ɛnɛkɛgi ʋa.

¹⁰Mina ɓeteʋe è-wɔɔlaiti ba, ta è-ɠɛɛ bɔɔlaiti. Ni ɗa ɠɛna faaɓaagi zu, mina ɓizɛ, è ʋa li è-ɠɛɛloin ʋɔ bɛ, mazɔlɔɔ siɛ mɔinmɔin su, è-zeiɲɔɠɔi maaɓuɠaai è ʋa, naa vizɔgɛ é leʋe è-ɠɛɛloin ʋa, maaɠoozaai è ʋa.

¹¹Ziɛ ga ɠimalai dòun zunu, zìimaʋɛ laa ɠa ve ga koozunɛɛi, nà zoo gè naati gooɠaaʋote, niiti ti vaazu mà.

¹²Ɠima nui a faaɓaagi ɠaana, é ɗa ʋa, toɠa ɗa lɔɔɠu. Nui nii é la dɛ faa mɔinmɔin kwɛɛ, naa ɠa ɗa li nɔ ga yiima ʋelei, eyɛsu é suɓoloi ɠɔmɔ.

¹³Ni nui ta a ɓɔɠɔ ɠɛna ga zeelaga è ʋɔ bɛ, é ʋilɛ nui ta ná-kuye vaa ʋa, nii è la kwɛɛ, ná-seɠei zeɠe ga kpɔunmai, nui naa ná-faa zu, nii è la kwɛɛ.

¹⁴Ni nui ta a tuya loona seiɲɔɠɔi ʋɛ, é wooɠula la sobuzobui, toɠa leve bɛ ga foovooi.

¹⁵Kpɔɛleʋe anzanui ɠɛɛʋɛ eɠɛ ziɛi, é ʋilɛsu peinpein, maa la leʋezu tonai ʋa voloi.