Tɛnɛ Faalaaliiti 20:2-26

²Masagi a yiiɠaawanana, maa ɠa ɗa yiki eɠɛ zalai zikɔ wooi, ɗɛi ɗa masagi ná-ziiɠaawanai ɠaazulɛɛna, è-yɛnvui ɠa faaɓaagi laawu.

³Nu maaɠooza sakpegi ʋa, naa ɠa ga lɛbiya vaa. Kɛni ɠimalala nui ɠa a ɗa woizuɓɔlɔ, é lɔ su.

⁴Dɔɔʋɛ nui la ɠɛ kɛɛni, é ʋa wozai woli ma yeeɠɛɠalai, ani la ɠɛa ná, nii a teʋe molo leʋei zu.

⁵Kisiɛiti ti nuɓusɛi yiimaʋɛ, ta ga ziɛi buuzeiɗai, keleɠele nui ɠa soogai ta zaɠazu.

⁶Nu mɔinmɔin ka ɗa ná-wooɠɛɠiladai zulɛ, kɛlɛ mini ɠa sɔɓelama nui a ɠa ná?

⁷Telebo nui ɠa ziɛzu ná-sɔledai zu, undaanɛɛ vaa wola ɠa naa, ná-dointi bɛ, a zeɠena naa.

⁸Siɛgi zu masagi zeizu la tukpɔɠaaleʋezuʋɛ, toɠa ɗa faa ɲɔi yɔɠɔzuɠa, ga wɛlɛ laa ɠilagi nɔ.

⁹Ɓɛ ɠa a zoo é ɠɛ ma: «Zìimaʋɛ ɠoleaʋena, gè ɲadega koto la mɔ bà?»

¹⁰Nu kiloi ta kɔɠɔ ganii ma zii felegɔiti seɠe, é ʋa nuiti yaava, naa ɠa ga Ɠɔoɠɔ GALAGI maaɲɛɛi ba vaa.

¹¹Zunu loungoi ɠa ɗa ɓɔɠɔ ɠɛʋele lɛ ga ná-kɛɛwotiiti, nu ka ni sɔgi ɠa ʋa, é zɔle.

¹²Nu woiyeɠei é faa mɛnisu, nu ɠaazuʋɛ é wozaɠaazu, Ɠɔoɠɔ GALAGI ɠa é ti ɠilagilagi pɛ kpɛtɛa.

¹³Mina ɲiimɛnii wola nɛɛ ʋɛ, è mina gaaɓela baladai zu. Wuzeɠe ga sobuzobui, ɗa daamiani sɔlɔɔ, è ɓɔlɔ ba.

¹⁴Ani ɠeya nui ɠa ɗa ɠɛ ma: «É la ʋani! É la ʋani!» Kɛlɛ a zeɠena ná, é ɓɔɠɔ maamusɛ ga anii naa zɔlɔɔ fai.

¹⁵Zanugi ma vaa la ɓaani, kɔbu ani ʋagɔi mɔinʋɛ, kɛlɛ anii nii fizɔgai ti pɛ ba, naa ɠa é ga, nu laawooi é faaɠwɛgi veezu.

¹⁶Ni nui ta a ɓɔɠɔ ɠɛna ga zeelaga è ʋɔ bɛ, é ʋilɛ nui ta ná-kuye vaa ʋa, nii è la kwɛɛ, ná-seɠei zeɠe ga kpɔunmai, nui naa ná-faa zu, nii è la kwɛɛ.

¹⁷Daamianigi unmaai, mɔunpa toɠa ɗa nɛɛ, kɛlɛ naa ʋolu, toɠa ɗa ɠɛ ga kɔtui, é nui laaʋɛ laave.

¹⁸Faiti ti ɠazaʋisu, ti laa ɠa ɗa zeeli ga tɛnɛ pagɔiti maaʋele. Ɗa ɠɛna lia kɔɔmaʋɛ, gaalugi wo, è faiti kpɛtɛ.

¹⁹Zɔi é fama ɓɔɛi vazasu, naa ɠa dɔɔɠuzu vaiti kulazu. À mina ɓɔ faa ma, wa nuiti ti kpɔɛzuɠula ɲakaiti bosu.

²⁰Zɔi a kɛɛɠɛ voovo ta dee, zii ɠa loo, eɠɛ lanboi é zaazu kpidi ɓɔii zu.

²¹Poganii sɔlɔɔgai ga gaazuvilɛi mɔunpagi zu, tuya la ɠɛa ma naa ʋolu.

²²Mina ɠɛ ma: «Nà nɔ̀nɔ ʋotokula!» Ɠito Ɠɔoɠɔ GALAGI ʋa, toɠa è ɠizo.

²³Ɠɔoɠɔ GALAGI maaɲɛɛ ɠa ga kɔɠɔ ganii daa la zeelini, é la vaa zɛɛ ɠiloi wu.

²⁴Ɠɔoɠɔ GALAGI ɠa é losu nui luɠɔ ná-eteai zu. Nuɓusɛi ɠa zoo ɠale é pelei ɠwɛɛ, nii é ziɛzu la?

²⁵Polu la ʋani nui ma, è ʋa ani ve Ɠɔoɠɔ GALAGI ʋɛ ga gaazuvilɛi, ɓaa è minazeɠe pɛ, è ʋa leɠa ɠigaiziɛ su.

²⁶Ɠima masagi ɠa ɗa faa ɲɔu ɠɛ nuiti so, é faa la ti ma, maawɔinɠa la su.