Tɛnɛ Faalaaliiti 19:2-23

²É la vizɔni nu nɔpɛ ma, é ʋa ʋala faaɠwɛgi ma, zɔi é ɠɔɠɔzuvilɛzu, toɠa ɗa faaɠaazagi ɠɛ.

³Nui ná-ɠimalalai ɠa ɗa ná-pelei ɠaaʋala ba, é ɗa yiiɠaawana Ɠɔoɠɔ GALAGI ma niina.

⁴Naavoloi ɠa ɗa nui wɔɔlai mɔin gola, kɛlɛ bala nui bɔɔlai ɠa ɗa ɠɛlɛ ba.

⁵Zɛɛ zeelei zalalalai la yɛga, doɠai la ʋoolaa naa ʋa, nii é zɛɛi vazasu.

⁶Nu mɔinmɔin ka ɗa sɔɓelama nui maamusɛ gaazu, ɛsɛ ka pɔ é ɠɛ ga naa bɔɔlai, nii é faanɛɛi ɠɛɛzu.

⁷Bala nui la nɛɛni kɛɛɠɛlointi bɛ, ɓaa mu ná-siɛpoluiti, naati ta ɗa maaɠooza ba. Siɛgi zu é wɔinni la ga é ɓɔɛ ti ʋɔ, ti la mɔ koba.

⁸È kigaiziɛi maaɠɔli, ɗa naa ɠɛɛzu ɗa ɓɔɠɔi ɗa-undaanɛɛi vaa ma, ɗa ɠilina ɠimalai ʋa, ɗa undaanɛɛi zɔlɔɔ.

⁹Zɛɛ zeelei zalalalai la yɛga, zɔi é zɛɛi vazasu, naa ɠa ɓɔɠɔ loozu ya.

¹⁰É la vizɔni ɠimalala nui ma, é ʋa eteai ziɛ gaanɛ zu, sɔnaga duɔi ʋa ɠɛ ga kundiɠiiti deve nu.

¹¹Nui ná-ɠimalai ɠa a ɗa vɔni da ná-ziiɠulagi ma, toɠa bɛ ga lɛbiya, é ná-faawanamaiti suvaayɛ.

¹²Masagi ná-ziiɠulagi maayikiʋɛ eɠɛ zalai zikɔ wooi, kɛlɛ ná-faanɛɛi ɠɛɛʋɛ eɠɛ nɔɗagi, nii é tufai ɠa.

¹³Faaɠaaɠaalala loun zunui ɠa ga kɛɛɠɛ ná-nimizai. Kpɔɛleʋe anzanui ɠɛɛʋɛ eɠɛ ziɛ goi, nii é ʋilɛsu peinpein maa la leʋezu.

¹⁴Nu ɠa zoo è pɛlɛi ta anii kpein sɔlɔɔ ga pogani è-ɠɛɛni zea, kɛlɛ Ɠɔoɠɔ GALAGI ɠila kpe nɔ ɠa a zoo, é ɠima anzanui ve nu ya.

¹⁵Dɔɔʋɛi ɠa ɗa nui wui ɓɔɠɔ ma, zɔi ɲakaai, pului ɠa so.

¹⁶Nii é devei zosu, naa ɠa ɓaazu zɛnvui maazu, zɔi é la ɠaaɓaazu siɛ ʋelei ma, naa ɠa za.

¹⁷Zɔi a bala nui maawɔinɠa, lɔdɔ kana é feezu Ɠɔoɠɔ GALAGI ya, naa ɠa naa ve zea, nii maanɛai ga é sɔlɔɔ.

¹⁸È-loun zunui maaɠolo gelegele, siɛgi zu kitogi ná la dɛ, kɛlɛ mina wɔin ga paa vaa.

¹⁹Nui ziiɠulazu, kɛni ti ani ɠula zea. Ni ti la ani ɠulani zea, ti zobo fea bɛ ga é tɔɔzei ʋolu.

²⁰Woilo tɛnɛ gooiti ma, va zelilomai wu, gaaɓelasu, ɗa ɠɛ ga ɠima nu.

²¹Nui ɠa ɗa faa mɔinmɔin kɛʋele ɓɛtɛ ná-kisiɛi zu, kɛlɛ Ɠɔoɠɔ GALAGI ná-devei ɠa daa a ɗa zeeli.

²²Nii nuɓusɛi pɔ nui ná-fai zu, naa ɠa é ga wooɠɛɠiladai, kɛlɛ tama, bala nui vizɔgɛ wooʋalada nui ʋa.

²³Ɠɔoɠɔ GALAGI ɠaazuluabai ɠa ɗa ɓɔ nu ʋa, è zɛnvui wo, anii pɛ ge ɠɛ è ya, è kpidiiti siɛ, maanɔɠɔ la zeelia è ma.