YAASINƆ 19:2-23

²Kokari vĩna dↄ̃naa sari manaro, wãna zↄ̃kↄ̃ↄ dì ń kɛ̃ zɛ́amɛ.

³Bisãsiri fayasarikɛ dì zɛ́ yakanɛ, akũ àdi Dikiri taari e.

⁴Aruzɛkɛ dì tó ò gbɛ̃nna le dasi, takaside gbɛ̃nna dì kɛ̃amɛ.

⁵Sèeda ɛ́kɛde ni bo pãro, ɛ́kɛde ni gí wɛ́tãmma leiro.

⁶Gbɛ̃ daside dì kpatableri tↄ́ nna sí, gbɛ̃ sĩnda pínki dìgↄ̃ ye gbadari gↄ̃ de a gbɛ̃ ũmɛ.

⁷Takaside danɛnↄ dì pã kpáimɛ, oni a gbɛ̃nnanↄ kɛ̃naa o doro. Tó àtɛn wɛtɛ à yã o kũńwo, òdigↄ̃ kú bɛro.

⁸Gbɛ̃ kũ àtɛn ↄ̃ndↄ̃ kũ ye a zĩdaimɛ, gbɛ̃ kũ à ye laakariii dì yã mana le.

⁹Sèeda ɛ́kɛde ni bo pãro, ɛ́kɛtori ni kakatɛ.

¹⁰Lákũ nnamanaa dí kↄ̃ sí kũ yↄ̃nkↄoro nà, lɛn zↄ̀ kíblena zĩdadenↄa dí kↄ̃ síoro lɛ.

¹¹Laakaride pↄ dì fɛ̃ likaro, lákana taarilamɛ a ĩadãbↄ ũ.

¹²Kína pↄfɛ̃na de lán músu pũtãnaa bà, a manakɛnnɛna de lán mↄtↄpisina sɛ̃̀ɛa bàmɛ.

¹³Nɛ́ yↄ̃nkↄmɛ a de yakana ũ, nↄ fìtide de lán ítↄtↄna zɛnaa sari bàmɛ.

¹⁴Òdi bɛ kũ a aruzɛkɛo le túbi ũmɛ, ama nↄ laakaride lenaa dì bo Dikiri kĩnaamɛ.

¹⁵Ma'ãkɛnaa dì ń da izↄ̃kↄ̃'onan, nàa dì gbɛ̃ gina dɛ.

¹⁶Gbɛ̃ kũ àdi yã'onnɛna da dì a wɛ̃̀ndi dãkpã, gbɛ̃ kũ àdi a zĩda yãkɛna daro ni ga.

¹⁷Gbɛ̃ kũ à wɛ̃nda dↄ̃̀ takasidenɛ pↄ́ sã̀kã Dikirinɛmɛ, àkũ mɛ́ ani a yãkɛnanↄ fĩna bonɛ.

¹⁸Ǹ n nɛ́ toto a gↄrↄa, ama ǹsun tó à gɛ̃ ↄla ari à garo.

¹⁹Pↄfɛ̃ri ni fĩna bomɛ, tó n a bò, a bona nigↄ̃ lɛ́ vĩro.

²⁰Ǹ lɛ́damma ma ǹ totona da, de ǹ ↄ̃ndↄ̃ kũ arɛ yãi.

²¹Laasun kú bisãsiri nɛ̀sɛn dasi, ama yã kũ Dikiri zɛ̀o mɛ́ àdi kɛ.

²²Gbɛ̃kɛn òdi wɛtɛ bisãsiria, takaside mana de ɛ́kɛdela.

²³Vĩnakɛna Dikirinɛ dì su kũ wɛ̃̀ndiio, gbɛ̃ kũ à vĩ dì i o laakariio kpatɛna, yã vãni dì a lero.