Tɛnɛ Faalaaliiti 14:10-34

¹⁰Ɛsɛ nɔ ɠa é ná-ziizoolɛi ɠwɛɛ, ta ná-koozunɛɛi, nu ɠili ge la zooga é ʋa nɔnɔ zɔlɔɔ naa zu.

¹¹Faa ɲɔu ɠɛ nuiti ta-ʋɛlɛi ɠa wolo, kɛlɛ sɔle nuiti ta-zeɠe ɠotai ɠaa ɠa wɔɔlɔ.

¹²Nu mɔinmɔin ka ɠisiɛzu ga pelei ti ma pagɛ, kɛlɛ tɔun, ta pelei ma, nii gaaɓelasu, é liizu ga tiye, é ti lɔ saai zu.

¹³Ɲɛɛi ɠa zoo é ziizoolɛi ɠaazumaalɔɔɠu, koozunɛɛi ɠa zoo é ɠaaɓela ga ziizoolɛi.

¹⁴Kɔzɔba nui ɠa ɗa ná-kɛɛwotiiti ma ɠulanumai zɔlɔɔ, kɛlɛ nu ʋagɔi ɠa ɠoozunɛ nɔnɔ ma ziɛ ʋeleiti ma ɠulanumai zu.

¹⁵Nui nii é la dɛ faa mɔinmɔin kwɛɛ, toɠa ɗa la naati kpein da, niiti ti wosu ma, kɛlɛ kidafaawu nui ɠa ɗa ziɛ ga keleɠele.

¹⁶Ɠima nui ɠa ɗa lua faa ɲɔi ʋa, é ʋoluave, kɛlɛ ɠimalala nui ɠa ɗa yiiɠaawana, é kɛ, tɔɔzei daave ɓɔɠɔ la.

¹⁷Ziiɠula nui ɠa ɗa ɠimalala vaiti kɛ, nui kigaiziɛ ɲɔi ziimaʋɛ, toɠa ɗa wɔinzeɠemai maaloli ɓɔɠɔ ma.

¹⁸Nuiti ti la dɛ faa mɔinmɔin kwɛɛ, naati ta-ʋoganii ɠa é ga ɠimalalai, kɛlɛ kidafaawu nuiti ta-masa bɔɔlɔgi ɠa é ga faaɠwɛgi.

¹⁹Nu ɲɔiti ta ɗa unmaayei nu ʋagɔiti bɛ, faa ɲɔu ɠɛ nuiti ɓalaa ta ɗa kɛ ɠana nɔ telebo nuiti ta-ʋɛlɛlaʋɛ.

²⁰Bala nui la nɛɛni nu nɔpɛ bɛ, anɛɛ seiɲɔɠɔiti, kɛlɛ kpɛtɛ nui wɔɔlaiti mɔinʋɛ gola.

²¹Zɔi é seiɲɔɠɔi wɔinzeɠezu, naa ɠa koto ɠɛɛzu, kɛlɛ undaanɛɛ nu ɠa ga naa, nii é maanɔɠɔ nuiti maawɔinɠaazu.

²²Niiti ti ɠisiɛzu faa ɲɔi zu, naati ta kaka pelei ma, kɛlɛ niiti ti ɠisiɛzu faa ʋagɔi zu, naati ta kɛɛzu nuɓɔɠɔlai ta gaamai zu.

²³Botii kpein ka kulanumai ba, kɛlɛ pului ɠa kpɔɛzuɠula wafuungi ʋolu.

²⁴Ɠima nuiti ta-masa bɔɔlɔgi ɠa é ga ta-naavoloi, ɠimalala nuiti ta-vaaɠaaɠaalalai ɠa é ga ta-litigi.

²⁵Gaama wo zeelei ɠa ɗa zɛnvuiti kizo, kɛlɛ zɛɛ wo zeelei ɠa ga yaava nu.

²⁶Zɔi é luazu Ɠɔoɠɔ GALAGI ʋa, naa ɠa kito gola zɔlɔɔ, ná-doun zunuiti ti dɔɔɠuzu zɔlɔɔ pɔ bɛ.

²⁷Ɠɔoɠɔ GALAGI ɠaazuluabai ɠa é ga zɛnvu ɗɛungi, toɠa nu ɠizo saai ná-baliiti ma.

²⁸Nuɓusɛi ná-mɔin ɠa é ga masagi ná-lɛbiyai, kɛlɛ nuɓusɛiti maaʋɛlɛ vai ɠa ɗa kundiɠii ɠoloɠolo.

²⁹Zɔi zii la ɠula fala, naa ɠa ná-ɠimala wolai lɛɛzu, kɛlɛ ziiɠula nui ɠa ɗa ná-ɠimalalai zulɛ.

³⁰Ziilɛigi ɠa é ga kpusɛi ná-sii zuɠoozagi, kɛlɛ toloi ɠa é ga seeɓɛi ma ɠaeiti su.

³¹Nu a bala nui maanɔɠɔna, è Kpɛtɛ Nui ʋɛlɛʋɛlɛga, kɛlɛ nu a maanɔɠɔ nuiti maawɔinɠaana, è ti Ɓɛtɛ nui lɛbiya.

³²Faa ɲɔu ɠɛ nui ná-yaavai ɠa ɗa toka, kɛlɛ kitogi ɠa ɗa ɠɛ telebo nui ya, eyɛsu saai.

³³Ɠimalai ɠa ɗa zei keleɠele nui yiimaʋɛ, naa ɠwɛɛgɛ ɓalaa ɠimalala nuiti saama.

³⁴Telebodai ɠɛɛ vai ɠa ɗa zooi wɔɔlɔ, kɛlɛ kotoi ɠa ga nuɓusɛiti kpein unfe faa.