Sua Tutŋana 13:18-25

¹⁸Tomtom ta so ileŋsil sua tutŋana, na kaimer ko imbot ŋoobo mi ka miaŋ biibi. Mi tomtom ta so ileŋleŋ la sua pazalŋana, na kaimer zaana ko iwe biibi.

¹⁹Sombe tanamnaama koroŋ sa ma molo mana takam, inako ikam ti ma lelende ambai kat mi toso: “Aa buri!” Mi wal kankaanaŋan ta tizorzooro na, lelen be tipizil ndemen pa mbulu kizin sananŋana ri sa som.

²⁰Tomtom ta so igabgaaba wal ŋgarŋan, nako iwe tomtom ŋgarŋana. Mi tomtom ta so igabgaaba wal kankaanaŋan ta tizorzooro na, ni ko indeeŋe pataŋana.

²¹Zin wal ta mbulu kizin irao pa Anutu mataana som na, pataŋana indeŋdeeŋe zin. Mi wal ndeeŋeŋan na, mbotŋana ambaiŋana ta iwe len kadoono.

²²Mazwaana ta so tomtom ambaiŋana imbotmbot toono na, ni ikamam le koroŋ boozo. Tana kaimer sombe imeete, na lutuunu ma tumbuunu bizin ko tikam len matamur ambaiŋana. Mi zin wal ta mbulu kizin irao pa Anutu mataana som na, koroŋ boozomen ta tindoundou na, kaimer ko iwe wal ndeeŋeŋan len.

²³Ŋonoono, mokleene kizin wal sorrokŋan ipiyotyooto kini boozo. Tamen tomtom tipakamkaam zin mi tikamam ŋoobo mbulu pizin, tabe kan kini irao som.

²⁴Tomtom ta so lutuunu ikamam ŋoobo mbulu mi ni ibalisi som, na iurur kat leleene pa lutuunu som. Mi tomtom ta so iurur kat leleene pa lutuunu, nako karau men mi ipazali mi iurpe mbulu kini.

²⁵Wal ndeeŋeŋan tikanan kini ma kopon bok. Mi wal sananŋan na, peteltel zin ma kopon golok kat.