Soukapwüng 18:17-31

¹⁷Iwe, ekewe limman mwän mi piin operi ewe fanü ra tolong lon ewe imw o angei ewe uluulun anü mi fal a kapachetä silifer won, ewe efot me ekewe uluulun anün leimw, lupwen ewe souasor a ütä ren ekewe wonopükü mwän mi nom leasamalapen tittin ewe leni fän ar pisekin maun.

¹⁸Iwe, lupwen ekewe limman mwän ra tolong lon imwen Maika o angei ewe uluulun anü mi fal a kapachetä silifer won, ewe efot me ekewe uluulun anün leimw, ewe souasor a aisiniir, “Met oua föri?”

¹⁹Nge ir ra üreni, “Kopwe chök fanafanala, kosap apasa och, kopwe etikem pwe kopwe eman semem me eman nöüm souasor. Ifa usun, esap mürina om kopwe souasor ngeni unusen eu ainang me eu eterekesin lon Israel lap seni om kopwe souasor ngeni chon leimwen eman mwän chök?”

²⁰Ren ekei kapas ewe souasor a fokun pwapwa lon lelukan. A angei ewe efot, ekewe uluulun anün leimw me ewe uluulun anü mi fal o eti ekewe aramas.

²¹Mürin, ekewe aramas ra kul o feila, nge nöür semirit, nöür man me pisekir ra akom mwer.

²²Iwe, lupwen ra toauela seni imwen Maika, Maika a kökkörawu ekewe mwän mi nom lon ekewe imw lükün imwan, pwe repwe tapweri ekewe chon Tan. Iwe, ra kan ngeni ekewe chon Tan

²³o leüömong le kökkö ngeniir. Nge ir ra kulsefäl o aisini Maika, “Met om osukosuk, pwe ka tapwerikem me om ei mwich?”

²⁴Nge Maika a pälüeniir, “Pwota oua fen aisiniei met ai osukosuk? Ämi oua angei ai kewe kot üa föriir me nei we souasor o süla far.”

²⁵Iwe, ekewe chon Tan ra üreni, “Kosap anini ngenikem pwe mwän mi nisosong rese turufuk o nikemiila me chon leimwom.”

²⁶Mürin, ekewe chon Tan ra feila won aler. Nge lupwen Maika a küna pwe ra kon pöchökül mwan, a kul o liwinsefäl ngeni lenian.

²⁷Mürin än ekewe chon Tan angei mine Maika a föri pwal nöün we souasor ra feila Lais, ra tori eu mwichen aramas mi mosonoson, resap ekieki pwe eman epwe maun ngeniir. Iwe, ra nirela ren ketilas o kenala ewe telinimw.

²⁸Esap wor eman mi angaseer, pun ar telinimw a toau seni Siton, resap pwal chiechi ngeni mwo eman. Iwe, Lais a nom lon ewe lemol arap ngeni Pet-rehop. Nge ekewe chon Tan ra aüsefälietä ewe telinimw o imweimw lon.

²⁹Iwe, ra aita ngeni ewe telinimw Tan, iten mwirimwirin ar we lewo nöün Israel we. Nge iten ewe telinimw me mwan Lais.

³⁰Iwe, ekewe chon Tan ra aütai ewe uluulun anü mi fal pwe repwe fel ngeni, nge Jonatan me nöün kewe mwän pwal mwirimwirir ra souasor ngeni ewe ainangen Tan tori fansoun ar oola seni ewe fanü. Iwe, Jonatan nöün Kersom we mwän, nge Kersom nöün Moses mwän.

³¹Nge förien Maika we uluulun anü mi fal a nom ikenan lon ükükün fansoun ewe imwen Kot a nom lon Silo.