Solomon 6:4-12

⁴Utew ka mekempet, pelanggè ku. Iring is kekempet nu te kekempet te inged he Tirza wey Jerusalem. Utew ka meupiya he ed-ahaan iring te menge sundaru he zuen dan menge bendirà.

⁵Kenà a kenikew tengtengi su henduen be te egkereney a tenged kenikew. Is bulvul nu henduen be te sengeleyuzan he kambing he edtupang puun te Buntud te Gilead.

⁶Is menge ngipen nu iring keputì te kerehidu he veǥu pa he neziǥù. Wazà netarin kayi ne meupiya is kebpemekesavuk dan.

⁷Is enaping nu he netembunan te lembung nu meriǥàriǥà iring te prutas he pumigranata.

⁸Minsan duen ku pa 60 he rayna he menge esawa wey 80 he urdinaryu he menge esawa, wey mahabet he menge raǥa he ibpeesawa kedì,

⁹ne sevaha zà is pelanggè ku. Mekempet sikandin ne wazè igkesawey kandin. Budtung sikandin he anak he vahi te iney zin ne edhuna is kebpelenggaa kandin te iney zin. Emun egkaahà sikandin te menge vahi, ne ebeǥayan dan sikandin te zengeg, ne minsan is menge rayna wey menge esawa ne edalig kandin.

¹⁰Ke sikandan te, “Hentei ves heini is emun edtengtengan ta ne iring te egkeriwaswas is kekempet din, wey iring te ebpenerètà he vulan, wey iring te edsilà he andew. Mekevivihag sikandin iring te menge vituen.”

¹¹Midtupang a ziyà te pemuleey te kayu he almindru su ed-ahaan ku is beǥu he menge pinemula he nenuvù diyà te zal-ug, wey ed-ahaan ku ke neneringsing en be is menge paras wey ke nengevukad en be is menge pumigranata.

¹²Ne wazè ku mevembentayi he ziyè ed bes te utew mekempet he hizeǥaan duma te pinelanggè ku.