SAN LUCAS 8:9-47

⁹ꞌBa kionga xutare tsiningiyare jó tsunire kjuakusunbiu,

¹⁰Jesús kitsure: —Jun je kitsaꞌeꞌndenu nga ku̱ankjinnu mé= xi ꞌmo tijña ngatꞌare ña batexuma Naꞌenchana. Tunga xuta xi yakꞌa, fakoña̱ nga ko kjuakusun, meni ninga skutsejen bi skue, ꞌba ninga kuasen ñojon bi ku̱ankjinre.

¹¹ꞌBa Jesús kitsu: —ꞌBi= tsunire kjuakusunbiu. Xujmo, jo=ni enre Naꞌenchana.

¹²Xujma xi tsixundai ndiyo, jo=ni xuta xi ntꞌe ion tunga ndiba chanayiu nga kjaꞌaxin en xi je tijñajin inimare xutabiu, tuxi bi ku̱akjainnire ꞌba kꞌuangi.

¹³ꞌBa xujma xi tsixu ngajin ndiojo, jo=ni xuta xi ntꞌe ion ꞌba tsja tsaꞌen kjebe. Tunga bi ꞌñu tjinre jama. Tu chuba nixtjin makjainre, ꞌba kionga chutꞌayako, tsichaja kjuamakjainre ꞌba basentꞌaxin.

¹⁴ꞌBa xujma xi tsixu ngajin naꞌyo, jo=ni xuta xi ntꞌe ion, tunga jotsaꞌen tifaꞌa nixtjiun, ꞌñu tsikjaꞌetsjen ngatꞌare tsajmi xi tjinre ngasunꞌndebi ꞌba mejénre kjuanyino ko kjuatsja xi tjinre. ꞌBa ngayéje kibi bi tsjaꞌnde nga nda ku̱acha ion ngajin inimare xutabiu, ꞌba bi tsja chan yaꞌa.

¹⁵Tunga xujma xi tsixu ña nda nangi, jo=ni xuta xi nda ꞌba kixi tijña inimare. Ntꞌe enre Naꞌenchana ꞌba ꞌbejñatjo ngajin inimare. Ko kjuatsejnda tsja chan xi nda, ngatꞌa kixi sejña.

¹⁶ꞌBa Jesús kitsure ngayeje: —Tsajain xi baka jngu ndiꞌi ꞌba ꞌbenere jngu tsajmi asa ngiꞌndere jngu nachan ꞌbejña. Tusa nga nkꞌa chun ꞌbejña, tuxi matsejennire xuta xi faꞌasꞌen niꞌyo.

¹⁷Ngatꞌa ngayéje xi tijñaꞌmo ngandaꞌe, kjuaꞌe nixtjin nga kꞌuetukatsejen. ꞌBa ngayéje xi bi matsejen ngandaꞌe, kjuaꞌe nixtjin nga xiare ꞌba sꞌe̱jñatsejen.

¹⁸ꞌBa meni, nda tjinuꞌyo. Ngatꞌa xi tjinre, ngisa= tse kuaꞌere. Tunga xi tsajainre, kaꞌnda mé= xi tseꞌe tsure stukjaꞌare.

¹⁹ꞌBa kio nare ko ntsꞌe Jesús jaꞌekun, tunga bi kuán echu kaꞌnda ña kui tijña, ngatꞌa kitse xutankjiun.

²⁰ꞌBa tu nijmi= kikꞌere Jesús: —Nari ko ntsꞌé ngandetsian inya ꞌba mejénxure skueri.

²¹Tunga Jesús kitsingojo: —Tuꞌyañu xi basen ñojon enre Naꞌenchana ꞌba tsikꞌetjusun, kui= xi nana̱ ko xi ntsꞌia̱.

²²Jngu nixtjin Jesús kitsure xutare: —Tjian xingunda ndachikun. ꞌBa ꞌbatsaꞌen jaꞌasꞌen jngu barku ꞌba kiji.

²³ꞌBa yejerañu nga inyafaꞌaxtiunda, Jesús kisꞌefe. ꞌBa kio kuanjin ndachikun jngu ntjoꞌñu, ꞌba nando tifaꞌasꞌenntjai barku. ꞌBa je stiungijndiu tsakaiñu.

²⁴ꞌBa ꞌbatsaꞌen kitsikjaꞌare Jesús, ꞌba kitsure: —¡Naꞌen, naꞌen! ¡Je tetiungijndia! ꞌBa Jesús tsisetjen ꞌba jatiko ntjo ko tsindiure ndachikun. ꞌBa kisꞌexiu ntjo ꞌba jña kuachun.

²⁵ꞌBa Jesús kitsure xutare: —¿Ánñu bi chunni_nuu̱? ꞌBa xutare kitsakjun ꞌba kuakunre ꞌba tsiningiyare xinkjin: —¿Yá= tsé xutabi nga kaꞌnda ntjo ko ndachikun tsikꞌetjusunre nga fako?

²⁶ꞌBa kio echu nangire xuta Gerasa. Kui nangibi tijña xingunda ndachikun, ngankjain nangi Galilea.

²⁷ꞌBa kionga Jesús ꞌetukajen barku, kitsitiñatꞌare jngu xuta xi kio tseꞌe ꞌba xi tjindujinre isennixtjin xi bi nda. Xi je ndaꞌe bi nde bajani najñu ninga bi nde ꞌbejñayani niꞌya. Tusa ngajin tsju ꞌbejña.

²⁸ꞌBa kionga tsabe Jesús, tsakasenkunchꞌintꞌare nga ꞌñu kiskiꞌndaya, ꞌba kitsu: —Ji Jesús, Kiꞌndire Naꞌenchana xi tijña ngankꞌaa, ¿mé= xi tjinri ngatꞌa tsaꞌan? Teꞌbetsꞌara̱ nga bi baꞌenaa̱ kjuanima.

²⁹ꞌBa kitsu isennixtjin xi bi nda, ngatꞌa Jesús je ꞌexare nga ngatꞌetukajinre xutabiu. Je nkjin ndiya isennixtjin xi bi nda batexuma ngajin yojore xutabiu, ꞌba nisi sꞌeꞌñu tsjan tsjan ndsaku ko ntsja ꞌba xuta tsikuenda, tunga xutabiu kjejntsu mé= xi sꞌeꞌñukonii̱, ꞌba isennixtjin xi bi nda fiko ngaꞌnde tꞌaxin.

³⁰ꞌBa kio Jesús tsiningiyare: —¿Jó ꞌmiri? ꞌBa kui kitsingojo: —Legión ꞌmina̱. ꞌBi kitsu ngatꞌa ꞌñu nkjin isennixtjin xi bi nda tjindujinre.

³¹ꞌBa isennixtjin xi bi nda ꞌetsꞌare Jesús nga bi ngatatsikasen ngaꞌnde ña baꞌentsjaire̱ kjuanima.

³²ꞌBa kio tiñare nindu ꞌñu nkjin tjiuchinga inyakjen ngijña. ꞌBa ꞌbatsaꞌen isennixtjin xi bi nda ꞌetsꞌare Jesús nga ngatatsjaꞌndere nga ngatjaꞌasꞌen ngajinre kui, ꞌba Jesús kitsjaꞌndere.

³³ꞌBa isennixtjin xi bi nda ꞌetukajinre xutabiu ꞌba jaꞌasꞌenjinre tjiuchingo. ꞌBa tjiuchingo tsangatsanga jenya kaꞌnda ndachikun ꞌba kio kitiungijndiu.

³⁴ꞌBa kionga xi inyatsikuenda tjiuchingo tsabe mé= xi kuán, tsanga ꞌba kikeꞌere nijmi xuta xi tjin naxinando ko xi tjindundai ngandaire.

³⁵ꞌBa xuta kikutsejenre mé= xi kuán. ꞌBa kionga echu ña tijña Jesús, tsabe xuta xi ꞌetjujinre isennixtjin xi bi nda nga tijñatꞌa ndsaku Jesús nga je yaja ngani najñure ꞌba nga je nda tjin nganire. ꞌBa kio kitsakjun.

³⁶ꞌBa xi tsabe mé= xi kuán, yeꞌere nijmi xuta xi yakꞌa jótsaꞌen kuanda xuta xi tjindujinre isennixtjin xi bi nda tsakaiñu.

³⁷ꞌBa ngatsiꞌi xuta xi tseꞌe nangi Gerasa ꞌetsꞌare Jesús nga ngatji kio, ngatꞌa ꞌñu kitsakjun. ꞌBa ꞌbatsaꞌen Jesús jaꞌasꞌen barku ꞌba kiji ngani xingunda ndachikun.

³⁸ꞌBa xuta xi je ꞌetjujinre isennixtjin xi bi nda ꞌetsꞌare nga kuetjenngi Jesús. Tunga Jesús bi kitsjaꞌndere ꞌba kitsure:

³⁹—Tusa tꞌin ngani niꞌyari ꞌba tꞌe nijmi ngayéje xi Naꞌenchana je kitsaꞌen ngatꞌa tsiji. ꞌBa ꞌbatsaꞌen xutabiu kiji ꞌba yeꞌe yejere nijmi ngatsiꞌi xi tjindu ngajin naxinando mé= xi kitsaꞌen Jesús ngatꞌa tseꞌe.

⁴⁰Kionga Jesús je jaꞌe ngani xingunda ndachikun, xutankjiun tsja tsaꞌen kiskjebetjo, ngatꞌa ngatsiꞌi inyakuyare.

⁴¹ꞌBa kio jaꞌe jngu xuta xi Jairo ꞌmi, xi ngakure niꞌya sinagoga. Kui xutabi tsakasenkunchꞌintꞌa ndsaku Jesús ꞌba ꞌetsꞌare nga ngatji ndaba,

⁴²ngatꞌa kiꞌndi chjun jngututure xi tjinre tejó nu je mejen kueya. ꞌBa yejerañu Jesús tifi, xutankjiun xi tjenngire ꞌñu inyaꞌbeꞌnyuꞌñundaire.

⁴³ꞌBa ngajinre xutankjiun tjenjinre jngu chjun xi kuatejó nu ꞌbakjanre jin. ꞌBa je kitsikjeya ngatꞌare chjineki ngayéje xi tjinre, ꞌba nijnguú kuánre kitsinda.

⁴⁴Kui chjunbiu kitsitiñatꞌa ngastun Jesús ꞌba kitsiko ndai najñure, ꞌba taꞌa kitikjayare jiun.

⁴⁵ꞌBa Jesús tsiningiya: —¿ꞌYá= xi kitsikona̱? ꞌBa kionga tuꞌyá kitsikixiya, Pedro kitsure: —Naꞌen, xutankjiun inyaꞌbeꞌnyuꞌñuri ꞌba inyatsunginiñari.

⁴⁶Tunga Jesús kitsu ngani: —Tjin= xi kitsikona̱, ngatꞌa tsejen kuánna̱ nga ꞌetjujin kjuaꞌñu ngajinna̱.

⁴⁷ꞌBa kionga chjunbiu tsabe nga bi ku̱an kꞌuejñaꞌmo, niki ꞌñu= titsakjun nga jaꞌekasenkunchꞌintꞌare Jesús. ꞌBa ngixkun ngatsiꞌi xuta kitsuya mé= kjua kitsikoni najñure Jesús ꞌba jótsaꞌen taꞌa kuanda.