Luk 8:9-47

⁹Anun a kum nat na ususer det tingi sur a kukurai ina wasiso elelar ri.

¹⁰Ma i watungi tandet lena, “O God i sa pitar tar a mananos tamot, sur mot in talapor una kum wasiso na pidik una nun a matanitu. Ikut torom a taro gisen a ususer det nama kum wasiso elelar, sur ‘det in tamtama ma det in tamtama, ikut ka det in tama lele i, det in longoro ma det in longoro, ikut ka det in tasmani.’

¹¹“A kukurai ina wasiso elelar ri i lenri, a pitino wit i elar nama wasiso anun o God.

¹²A kum pitino wit ra det puku una kisapi, det elar nama taro ra det longoro a wasiso, ra o Satan i wanpat, ma i rakon ru a wasiso gusun in balandet, sur gong det nurnur, ma gong di ulaun det.

¹³Ra a kum pitino ra det puku una nubual na watat, det elar nama taro ra det longoro a wasiso, ra det pam ukai i nama gasgas. Ikut kalako wakakorin det, anundet a nurnur ke tur suano i. Ra a kum larlar i wanpat torom det, det puku.

¹⁴A kum pitino ra det puku epotor una kum kuikui, det elar nama taro ra det longoro a wasiso, ikut a labino nuknuk una kinkinis anundet, a kum ululeng, ma a gasgas tagun a nilaun nin upiso, det rau bat a wasiso anun o God, ra ka det wu lako windet.

¹⁵Ikut a kum pitino ra det puku una wakak na piso, det elar nam ara taro ra det longoro a wasiso, ma a balandet i wakak ma i tokodos, ra det pam ukai dekdek a wasiso ra det muri tuk det wu a windet.

¹⁶“Katutaio in ungangon tar tu lam ma in wop bat tari nama paket, o in ubek tari kai nago utuntudu ina kabulu. Awu! In ubek tari ut netes una nun a turtur, sur det ra det ruk det in tama a talapor.

¹⁷Uni a kum utna rop ra i kis eno, numur in nanpat puaso. Ma a kum utna rop ra kura i parau, numur din tasmani ma in kis talapor.

¹⁸I mo ra mot in nuknuk wakak una wasiso ra mot longoro i. Osi ra i pam ukai a mananos una wasiso anun o God, din tabor meleti nama labino. Ma osi ra ke pam ukai tu mananos una wasiso anun o God, din rakon ru i utkai asau lik ra i nuki lena i pam ukai i.”

¹⁹O nan o Iesu ma a kum tistisino det wanpat sur det in tama i, ikut ka det pet lar pasi, uni a kunur na taro det tur talilis bat pasi.

²⁰Ra di inanos o Iesu lena, “O nam ma a kum tistisim kunago det tur nago upiso. Det nem na tama ui.”

²¹Ra i balu det lena, “Det ra det longoro a wasiso anun o God ma det muri, det ra o nang ma a kum tistising.”

²²Ara bung o Iesu tomo nama nun a kum nat na ususer, det kas una pot, ra i watungi tandet lena, “Dat nan utong una ara papor tasi.” Ra det wan.

²³Ra det kalabor nanan nama sel, o Iesu i inep dumun. A dekdek na wuwu i ragoti una du tasi, ra a top i walwalkas, ma milau det in iru.

²⁴A kum nat na ususer det wan toromi, det wangun pasi, ma det inanosi lena, “Tene Ususer, Tene Ususer, dat na iru!” I katutur, i turbat a wuwu ma a dekdek na top, ma der mana, ra i mililo rop.

²⁵Ma i watungi torom a kum nat na ususer lena, “Awai kuti anumot a nurnur?” Det ngara, ma det kisin, det ting etetalai det lena, “Osi na ngas na musano mulus ri? I wasiso torom a wuwu ma a top, ra der mur anun a wasiso!”

²⁶O Iesu ma a kum nat na ususer det wan tagitong una papor Galili, ra det sot una papor anun a taro Gerasa, tiro un ara papor du tasi Galili.

²⁷Ra o Iesu i sirok gusun a pot, ara musano tagun a tamon ra i wan barato i. A kum laulau na nion kura uni. I sa suano i, ma ke ser pipis, ma ke kis kai un tu rumu, i ser kis kut una kum kulam na minat.

²⁸Ra i tama pas o Iesu, i kukukuk, ma i puku pirso taru nisan aru kikino, ma i kukukuk namin labino walngano lena, “Iesu, a Nutun o God a Labino Sakit, asau ra u nem na pami un iau? A saring ui, gong u ukadik iau.”

²⁹I wasiso lenri, uni o Iesu i sa wasiso dekdek taru torom a laulau na nion sur in pirso gusun a musano ri. A susut na dino a laulau na nion i solsolongi. A taro ra det ser tamtamabati, det ser ker ukai aru lamano ma aru kikino nama sen, ikut i ser rubut det kut, ma a laulau na nion i ser ungongos pasi usapat una kum nubual kalako taro uni.

³⁰O Iesu i tingi lena, “A risam osi?” Ma i balu i lena, “A risang A Kabo Liur,” uni a susut na laulau na nion det sa ruk taru uni.

³¹Ma det saring o Iesu sur gong i tulu ruk tar det unin labino tung ra katu tuktukino.

³²A kabo liur na boro kura det wangon tiro una tangai. Ra a kum laulau na nion det saring o Iesu sur det in ruk taru una kum boro. Ra i mulaot ru det.

³³Ma a kum laulau na nion det pirso gusun a musano ra, ma det ruk taru una kum boro. A kum boro det kalabor pirso una palis sur a du tasi, ra det kongo rop.

³⁴A taro ra det ser tabor a kabo liur na boro, det tama a utna ri, det kalabor ma det inanos tiro utamon ma tiro utkai una kum natnat na tamon.

³⁵Ra a taro det wan sur det in tama asau ra i wanpat. Det wanpat torom o Iesu, det tama a musano ra a kabo liur na laulau na nion det pirso pas gusuni. Kura mukut i kis taru nisan aru kikin o Iesu, i sa pipis pas ma a nuknukino i sa talapor melet. Ma a taro ra det ngara doko.

³⁶Det ra det sa tama tari, det inanos a taro lena, o Iesu i sa lakro ru a kum laulau na nion gusun a musano ra.

³⁷Ma a taro rop tagitiro una papor anun a kum Gerasa det saring o Iesu sur in nan gisen gusun det, uni det ngara doko. Ra o Iesu i kas melet una pot ma i wan.

³⁸A musano ra a kum laulau na nion det sa pirso taru gusuni, i saring o Iesu sur in nan tomo nami. Ikut o Iesu i tulu ru i kut lena,

³⁹“Un milet melet sur anum a tamon, ma un wasiso una labino utna ra o God i sa pam tari un ui.” Ra i milet melet, i wasiso una tamon ra, una labino utna ra o Iesu i sa pam tari uni.

⁴⁰O Iesu i milet melet, a kunur na taro det gas pasi, uni det rop det kis langlang ut suri.

⁴¹Ara musano, a risano o Jairus, a mugumugu tagun a rumu na lotu, i wanpat ra i kis butkeke sa numugu tan o Iesu. I saring dekdeki sur in nan usa una nun a rumu,

⁴²uni ara nutunulik kut, a ino, anun a kilalo a noino ma aru, i sa ling na mat. Ra o Iesu i wan, a labino kunur na taro det talilis bat pasi.

⁴³Ara ino kura i misait nama gap elar nama noino ma aru kilalo, ikut kataio i ulangolango lar pasi.

⁴⁴I wan numur tan o Iesu, ma i tulan tar a sinisir ina saket anunu, ma uniutra a gap i tuk.

⁴⁵Ma o Iesu i iting lena, “Osi ra i tulan iau?” Ra det rop det ipul, o Pita i watungi lena, “Labino, ko tama a labino kunur na taro ri det talilis bat pas ui?”

⁴⁶Ikut o Iesu i watungi lena, “Ara pasandet i sa tulan tar iau, uni a tasmani lena, a dekdek i sa wan gusun iau.”

⁴⁷A ino i tasmani lena di sa sio pasi, ra i neneder pat, i wan ma i puku sa numugu tan o Iesu. Umatan a kunur na taro rop, i inanos o Iesu una kibino ra i tulan tari, ma i inanosi kai lena uniutra i langolango.