SAN LUCAS 1:29-61

²⁹Jinq'uin u chäni c'äsbäc'ti uc'a u yubin cua' u yäli, y u ch'i u c'ajalin cua' uc'a wäreca u lotän ca' jini.

³⁰De ya'i ni ángelo u yälbi ca'da: ―María, mach bäc'taquet, uc'a mäx ti'i u c'ajalin Dios t'oc ane.

³¹Ubixto, a xe a mätan a tz'isa, y a xe a päncäbesan untu a wajlo' y a xe a wäc'ben u c'aba' aj Jesús.

³²Uneba u xe de Ajnoja uc'a une chich u Yajlo' ni Dios, jini más Ajnoja que ayanba. Cä Yumla Dios u xe u yäc'ben ajnic de ajmanda ca' chich u najtäcäl noxi'pap oni, jini rey u c'aba' aj Davidba.

³³Une u xe tä nonoj colan u chen manda upete ni u noj q'uenel natil ch'ocob aj Jacob. Mach uxin tä xupo nunca u manda uneba.

³⁴De ya'i ix María u yälbi ni ángelo ca'da: ―¿Cache' ti da u xe tä ute cua' a wäle'ba? Uc'a no'onba mach'an quit'oc.

³⁵U p'albi ni ángelo ca'da: ―Ni Ch'u'ul Pixan u xe tä jaque ta'wac'o, y u poder ni Dios más Ajnojaba u xe u yäc'benet a mätan a tz'isa. Jin uc'a ni Ch'u'ul Ch'oc a xe a päncäbesanba, u Yajlo' chich Dios une.

³⁶Ubixto, a prima ix Elisabet täcä u mäti untu yajlo' tu ch'upimle. Ni ixic jiniba u yälcan que mach u ch'ä u mätan u tz'isa, y badaba u cänäntan seis mes c'ojo t'oc u bijch'oc.

³⁷Uc'a Diosba u ch'e' u chen upete cua' chichca.

³⁸De ya'i u yäli ix María ca'da: ―No'onba ixpatanon chich tuba cä Yumla. Tan u chen Dios t'oc no'on ca' a wäle'ba. De ya'i ni ángelo pasi ca'an une y bixi.

³⁹Jinchichba q'uinob jini ch'oyi ix María, y seb bixi ump'e caj tä isquil cab ya'i tama ni noj cab tä Judea.

⁴⁰Ya'i ochi tan yotot aj Zacarías u yäc'ben u c'aba' Dios ix Elisabet.

⁴¹Jinq'uin ix Elisabet u yubi u c'aba' Dios que c'oti u yäc'ben ix Maríaba, u niqui uba ni ch'oc tuyac'o ix Elisabet, y uneba c'ac'a' ochi Ch'u'ul Pixan tuyac'o.

⁴²Ix Elisabet u chi noj t'an u yäle' ca'da: ―Ane Dios u yaquet tuba ajnic más a ch'a'aljin que otros ixictacob, y Dios u yaqui täcä ni a Wajlo' a xe a päncäbesanba y u ch'u'ul chi.

⁴³¿Caxcajon no'onba tuba tiquet a chänenon, ane que a xe de u na' Cajnoja?

⁴⁴Jinq'uin cubi cache' a wäc'benon u c'aba' Dios, tajtzäc u niqui uba ni ch'oc t'oc ch'a'aljin täjcac'o.

⁴⁵Ch'a'a ajin aneba uc'a a tz'oni cache' u xe tä pase toj chich lo que cä Yumla u täsquet tä älbinte.

⁴⁶De ya'i ix María u yäli ca'da: Tan cä pixan cä c'alin ben u c'aba' Dios uc'a lo que u cherbon.

⁴⁷Ni Dios Cajjäpomba, jin une u yäc'ben ch'a'alac ujin cä pixan,

⁴⁸uc'a une u ch'ämbon yajin, no'on que ixpatanon tubaba que mach jin cua'on une. Desde badaba upete ajji'pät ch'ije u xe u yäle'ob cache' mäx q'uen cä ch'a'aljin,

⁴⁹uc'a Dios, jini tä' q'uen u poderba, machtajda u chi por no'on. Ch'u'ul ayan u c'aba' uneba uc'a mach'an niump'e u tanä.

⁵⁰Upete machcatac mach yo u säte' t'oc Diosba, une chich u ch'ämbenob yajin. Che' chich u chi oni y che' chich u chen bada.

⁵¹Ca' untu winic u ye'e' u muc' t'oc u c'äbba, ca' jini Dios u ye'i u poder. Y ca' untu winic u puc'jule' cua' chichca mach utzba, ca' jini Dios u yäc'bi u puclan ubajob jini machcatac u yäle' tan u c'ajalinob cache' q'uen u c'ajalinobba.

⁵²Dios u pa'säbijob u poder nuc ajnojajob y u yäc'bijob u poder machcatac ch'oc u pixanob.

⁵³Machca jitz'o u chen c'änä äc'bintic cua' u c'uxe' ixta que c'alin na'ac. Ca' chich jini täcä machcatac que tä' yo que Dios u täclenob, Dios u c'alin täclijob chich. Machca q'uen u taq'uin mach ni' c'änä uc'a äc'bintic más. Ca' chich jini täcä machcatac u yäle' tu c'ajalinob que mach c'änä uc'a u täclen Dios, Dios chich mach u yäc'bijob niump'e cua'.

⁵⁴Dios u täcli aj Israelob, ni machcatac u tz'omben u t'anba. Dios u c'ajti'in cache' une u worin älbi cä najtäcäl noxi'papla que une u xe u ch'ämbenob yajin. U yälbijob que une u xe u paq'uin ch'ämben yajin aj Abraham y upete u natil ch'ocob. Ca' jini u yäli ix María.

⁵⁶Ix María coli ya'i tu yotot ix Elisabet ca' ta uxp'e mes y de ya'i bixi tu yotot.

⁵⁷C'oti q'uin tä c'ojpan ix Elisabet, y u päncäbesi untu yoc ajlo'.

⁵⁸U yajnätz'älajob y u familiajob u yubijob cache' Dios u c'ac'a' ch'ämbi yajin ix Elisabet y ch'a'ali ujinob t'oc une.

⁵⁹Jinq'uin tz'äcti ocho día, c'otijob u yäq'ue' ni ch'oc tä äc'binte ni seña tu cuerpo, jini u c'aba' circuncisiónba. De ya'i u yäli u yäc'benob u c'aba' u pap, aj Zacarías.

⁶⁰Pero u na' u yäli que mach. Aj Juan u xe u c'aba'.

⁶¹Unejob u yälbi ca'da: ―¿Cua' uc'a? Mach'an niuntu a familia u c'aba' ca' jini.