Luka 1:29-61

²⁹Mariya hayahulike mbuli ayo, tsakalangula mne ghumoyo ghwake, naye kakangawala imbuli ino ina mana yachi.

³⁰Malaika kamlongela, “Mariya, uleke kupfuka! Imulungu kakutendela uluso.

³¹Kutsokinda inda na kutsakweleka imwana immale, kutsomwing'a taghwa Yesu.

³²Katsakuwa mkulu na katsokemighwa Imwana we Imulungu yali Kuchanya Ng'ani. Imtwatsa Imulungu katsomwing'a chighoda cha undewa che imbala wake Daudi.

³³Katsokuwa imndewa we iwana wa Yakobu ghamatsuwa ghose, ne undewa wake ng'autsomala bae!”

³⁴Mariya kalonga ne malaika, “Nene na-mwali sina niwase bae ne immale. Kuya lelo itsakuwatse?”

³⁵Malaika kamwidika, “Ghumuhe Mwenzeka katsokutsila, na ngupfu tse Imulungu tsitsokughubika. Apfo imwana mwenzeluka katsakwelekighwa, katsokemighwa Imwana we Imulungu.

³⁶Kwomkumbuka ndughu yako Elizabeti. Tsailongighwa ng'atsokweleka bae iwana, lekeni sambi kana inda ya miyetsi sita, pfipfo pfayali mnzehe.

³⁷Kwaapfila kuduhu ichinu Imulungu ng'ochidaha bae kuchitenda.”

³⁸Mariya kalonga; “Nene na imtumwa we Imtwatsa, nendelighwe ka pfaulongile.” Kuya malaika ayo koka.

³⁹Matsuwa ghaghala Mariya katsumka kaghenda mne ghumji ighuli mne pfidunda pfa isi ya Yudeya.

⁴⁰Ako kengila mne ing'anda ya Sakariya, kamlamsa Elisabeti.

⁴¹Elisabeti hayahulike Mariya komlamsa, imwana kadaluka munda mwake. Elisabeti kamemetsighwa na Ghumuhe ghwe Imulungu,

⁴²kalonga kwa kukemelela, “Kubweda kubita iwapinga wose, ne imwana yutsomweleka kabalikiighwa!

⁴³Ebali chinu chino chindawila nene, mbaka mai we Imtwatsa wangu yanyangile nene?

⁴⁴Hanihulike kwondamsa, imwana kadaluka munda mwangu kwa ndeng'elelo.

⁴⁵Ng'apfu ghweghwe yutoghole ka ghatsolawila aghala ghayakulongele Imtwatsa”

⁴⁶Mariya kalonga, “Ghumoyo ghwangu ghomtoghola Imtwatsa;

⁴⁷ghumoyo ghwangu ghwomdeng'elela Imulungu iyali Mkombotsi wangu,

⁴⁸kwaapfila kaukumbuka udodo we imtumwa wake! Kulawa sambi na kughendelela iwanu wose watsong'ema na imunu iyebwedile

⁴⁹kwaapfila Imulungu yane Ngupfu kanendela makulu. Taghwa lye Imulungu lyenzeluka.

⁵⁰Kowonela libatsi iwanu wala iwompfuka. libatsi lyake lyokala lweleko mbaka lweleko lungi

⁵¹Tsakatenda ipfinu pfikulu kwa ghumoko ghwake. Kawapwililisa iwanu iweghodile mne imimoyo yawo.

⁵²Kawahulumsa iwandewa kulawa kune ipfighoda pfawo pfa undewa, na kawenula iwali mbughilambughila.

⁵³Kawaghutisa wane inzala kwa pfinu pfinoghile, na kawawinga matajiri ghamoko ghaliyeka.

⁵⁴Kamwapfila imtumwa wake Isiraeli, na ng'esemwile bae kumlangusa libatsi lyake.

⁵⁵Kakumbuka kumwonela libatsi Abrahamu na lukolo lwake ghamatsuwa ghose!”

⁵⁶Mariya kakala na Elizabeti kwa miyetsi midatu, kuya koya ukaye yake.

⁵⁷Matsuwa gha Elisabeti tsaghapfika ukweleka imwana, naye keleka imwana immale.

⁵⁸Iwanu wali habehi yake ne iwandughu tsake hawahulike Imulungu pfamwonele libatsi sideke, wose wadeng'elela naye.

⁵⁹Imwana hapfikile matsuwa manane, watsa kumwingitsa ngoma. Wabama kumwing'a taghwa Sakariya, taghwa lya aba wake.

⁶⁰Kuya mai wake kalonga, “Bae! Taghwa lyake katsokemighwa Yohane!”

⁶¹Walonga, “Pfii mbona kwahela ndughu iyokemighwa taghwa lino mlukolo lwako!”