SAN LUCAS 1:29-61

²⁹Nej a nüx wüx tajaw aaga ángel, mbayaw manguiay andeac, tapiüng tiül omeaats nej: “¿Neol tatepeay xic atquiaja?” aw.

³⁰Quiaj tasaj nej aaga ángel: ―María, nde mbayamear, cos Teat Dios apmambeol ic xeyay.

³¹Nganüy apmejiür micual, apmewiquiach nop nine nench, apmeaach manüt JESS.

³²Nej apmajlüy xeyay netam ajlüy. Apmanderac wüx nej apmapiürang micual nej Teat Dios najlüy tiül cielo. Teat Dios apmüüch nej marang nop minatang nenajiüt atnej tarang wüx a Rey David, mixeech nej najlüy tanomb.

³³Nej apmajlüy wüx meáwan nipilan judío micual teat Jacob, apmarang natang meáwan nüt, aag ayaj ngo majiür ndoj ―aj nej.

³⁴María tasaj a ángel: ―¿Nguineay alndom majlüy aaga ipiüng quiaja, cos xique nganaw najiür xenoj? ―aj.

³⁵Quiaj tasaj nej a ángel: ―Aag ayaj Nangaj Espíritu ocueaj Teat Dios apmerang. Nej Teat Dios apmajiür ic mewiquiach aaga nine, cos aaga nine quiaj nangaj nej Micual Teat Dios.

³⁶At icualaats müm Elisabet apmajiür nop nine. Masey xeyay latang ombas, anderac nómban ngondom majiür micual nej. Nganüy lacual lamajiür anaíw micaaw a nine teomeaats nej.

³⁷Cos para Teat Dios ngo majlüy nicuajind naél ngondom marang ―aj nej a ángel.

³⁸Quiaj tapiüng a María: ―Xique nganüy sajlüy tiül owix Teat Dios, ich marang wüx ximbas atnej lamepiüng apmarang ―aw. Quiaj tamb a ángel.

³⁹Tíülan aaga nüt quiaj María tamb najen andüy tiül tiüc tiül noic cambaj tiül iüt Judea.

⁴⁰Wüx tapeay quiaj tajmel aniüng teat Zacarías, quiaj tatepeay müm Elisabet.

⁴¹Wüx Elisabet tanguiay atepeay nej María, quiaj ajwicwic teomeaats nej aaga nine. Quiaj Nangaj Espíritu ocueaj Teat Dios tiün andüy wüx nej.

⁴²Quiaj tandeac napac, tapiüng: ―Xeyay najneajay apmanderac wüx imbas tiül meáwan montaj, aton xeyay najneajay apmanderac wüx ombas aaga nine alteomeaats quiaj.

⁴³¿Jow a xique, cuane xic, miün majaw xic mimüm Micual Xeteat Diosa?

⁴⁴Cos wǘxan sanguiay itepeay xic, quiaj xecual apac omeaats, ajwic tiül ximeaats.

⁴⁵Najneajay apmapac imeaats cos teyar meáwan leaw lamasaj ic Teat Dios nguineay apmarang ―aw.

⁴⁶Condom quiaj tapiüng a María: Sayaag tiül ximeaats xeyay najneajay arang Teat Dios.

⁴⁷Apac ximeaats wüx Teat Dios, cos nej newün xic wüx.

⁴⁸Teat Dios najneaj majaw xic masey xique ngo nembeat nicuajind tiül nipilan. Naw wüx nganüy meáwan nipilan aliüc miün, apmandeacüw xeyay najneaj wüx ximbas.

⁴⁹Cos lamarang xeyay najneaj wüx ximbas Teat Dios; nej cuajantanej alndom marang, Xeyay nangaj minüt Teat Dios.

⁵⁰Nej andiüm meáwan nipilan leawa lajlüy nganüy, aton ajiür lasta leaw aliüc miün apmajlüy, meáwan leaw apmayariw nej andeac.

⁵¹Naag owix nej lamarang xeyay nadamdam cuajantanej, aton tandrooch ombasüw monpiüng nejiw alwüx atamüw.

⁵²Tawün niüng tsotojow montangtang monajiüt, tayac quiaj leaw ayajcüw ngo membeatiw.

⁵³Nipilan leawa ngo majiür üetiw, nej tüüch meáwan najneaj; nganüy nipilan monjiür xeyay, tüüch mambüw owixáwan, nicuajind ngo maxomüw.

⁵⁴Tambeol cambaj Israel, ajcüw monrang minajiüt nej; ngo ndrom omeaats nejiw, tajiür nejiw lasta xeyay,

⁵⁵cos atquiaj tasaj mixejchiiüts Abraham wüx micual micual nej; tapiüng tanaámb apmajiür nejiw lasta meáwan nüt ―aw a María.

⁵⁶Ndoj María tacül quiaj maquiiüb müm Elisabet arej caaw, condom tandilil tajtsor alinomb.

⁵⁷Wüx tatüch a nüt wijquiam micual nej müm Elisabet, quiaj wijquiat nop nine nench.

⁵⁸Wüx tanguiayiw acualaats nej, at moncül quiájan niüng acül nej, nguineay Teat Dios lamajiür nej xeyay lasta, quiaj tapac omeajtsüw aton maquiüjpüw.

⁵⁹Condom wüx tatüch ojpeacüw nüt, quiaj taquiüjpüw a nine matajcüch circuncidar atnej mbójan arangüw judíos. Tandiümüw müjchiw manüt Zacarías atnej minüt miteat nej.

⁶⁰Quiaj mimüm nej a nine tapiüng: ―Ngwüy, Juan apmanüt ―aw.

⁶¹Quiaj tasajüw nej: ―¿Neol ayaja? Cos ngo majlüy tiül icualaats nejinguind manüt atquiaj ―awüw.