San Lucas 1:29-61

²⁹Xaxeꞌe xa duꞌa n‑jaꞌan‑ia, n‑chi ini María, te n‑xani ini‑ña nuu nax kuu xa n‑jaꞌan‑ia nuu‑ña.

³⁰Te xiaꞌan‑ia nuu‑ña: —Maxku yuꞌu‑n, María chi ɨɨn xa vaꞌa kada ñaꞌa Ianyuux.

³¹Vitna niꞌi daꞌya‑n, kajan‑n daꞌya yɨɨ. Jesús danani‑n‑ia.

³²Ia yaꞌa, ndandɨꞌɨ‑ia, te kuu‑ia Daꞌya Yɨɨ Ianyuux, Ia kuu Xtoꞌo‑ro. Juñaꞌa‑ia ñuu daꞌya dana Israel nuu n‑taxnuni David, se kuu xixitna‑ia,

³³xa taxnuni‑ia nɨkava nɨkuita —kuu‑ia.

³⁴Te n‑jaꞌan‑ña nuu‑ia: —¿Janda io xa duꞌa yaꞌa?, chi ta jini ka‑da teyɨɨ.

³⁵Te xiaꞌan ángel nuu‑ña: —Keé ñaꞌa Espíritu Ianyuux, te niꞌi daꞌya‑n. Daꞌya Yɨɨ Ianyuux kuu‑ia. Ii‑ia.

³⁶Juini n‑yɨɨ Isabel, ñá kuu tnaꞌa‑n, ko n‑kuu iñu yoo ñuꞌu daꞌya‑ña. N‑ka xani ini ñayiu xa ma koo daꞌya‑ña, ko koo daꞌya‑ña vitna.

³⁷Xaxa Ianyuux ntdandituꞌu xa ñatu kuaꞌa ñayiu xa kada‑i kida‑ia —kuu ángel, xiaꞌan‑ia.

³⁸—Daña xinokuechi‑da nuu Ianyuux, Ia kuu Xtoꞌo‑ro. Na kuu na n‑jaꞌan‑n —kuu‑ña, xiaꞌan‑ña. Ijan dada juan nuꞌu ángel, ia xinokuechi nuu Ianyuux.

³⁹Kɨu ijan ni juaꞌan‑ña yuku distrito Judea nuu katuu ɨɨn ñuu luchi.

⁴⁰N‑xee‑ña ijan, te n‑xeꞌen‑ña veꞌe Zacarías, te n‑jaꞌan‑ña nyuux nuu Isabel.

⁴¹Nu n‑teku Isabel xa n‑jaꞌan‑ña nuu‑ña, te n‑kanda daꞌya ñuꞌu xiti‑ña chi n‑kudɨ ini‑s, te n‑keé Espíritu Ianyuux Isabel.

⁴²Xee n‑jaꞌan‑ña. Xiaꞌan‑ña nuu María: —N‑kida ñaꞌa Ianyuux xavaꞌa. Taꞌu kuu‑un, te taꞌu kuu daꞌya kajan‑un.

⁴³Nava vaxi dichi kuu dɨꞌɨ Ia kuu Xtoꞌo‑ro veꞌe‑r.

⁴⁴Nu n‑teku‑r xa n‑jaꞌan‑un nyuux nuu‑r, n‑kudɨ ini daꞌya ñuꞌu xiti‑r, te n‑kanda‑i.

⁴⁵Naka taꞌu‑un chi jandixa‑un xa jɨn tnaꞌa xa n‑jaꞌan Ianyuux, Ia kuu Xtoꞌo‑ro —kuu Isabel, xiaꞌan‑ña.

⁴⁶Xiaꞌan María: Ndadakaꞌnu‑da Ia kuu Xtoꞌo‑ro.

⁴⁷Te kudɨ ini‑da chi dananitaꞌu ñaꞌa‑ia.

⁴⁸N‑chinuu Ianyuux xa kundaꞌu kukee‑da. Naꞌa ñaꞌa‑ia, te naꞌa‑ia xa xinokuechi‑da nuu‑ia. Vitna kixeꞌe ntdaa ñayiu xa jaꞌan‑i xa taꞌu kuu‑da,

⁴⁹chi kueꞌe xavaꞌa n‑kida ñaꞌa Ianyuux. Ii‑ia.

⁵⁰Kundaꞌu ini‑ia ñayiu ka yuꞌu nuu‑ia. N‑kundaꞌu ini‑ia xixitna‑ro, te n‑kundaꞌu ini ñaꞌa‑ia roo, te dani kundaꞌu ini‑ia daꞌya dana‑ro.

⁵¹Kueꞌe xavaꞌa n‑kida ñaꞌa‑ia. N‑xate niꞌno‑ia ñayiu xe ini. Ñayiu ijan ka xani ini xa ña ka ndoñuꞌu‑i‑ia.

⁵²N‑kida‑ia xa te ka taxnuni, ña taxnuni ka‑te. N‑kida‑ia xa ñayiu ka kundaꞌu ka kukee, nduu‑i ñayiu ndandɨꞌɨ.

⁵³Kueꞌe xa n‑taxi‑ia roo, ñayiu ka kojon ka yichi chi ka kundaꞌu‑ro, te ma kojon ka‑ro. Ni ɨɨn ña tuu nax n‑xiaꞌan‑ia ñayiu kuika; duꞌa ntakaa ndaꞌa‑i ka nuꞌu‑i.

⁵⁴N‑chindee ñaꞌa‑ia roo, ñayiu Israel, ñayiu xinokuechi nuu‑ia chi naꞌa ñaꞌa‑ia, te kundaꞌu ini ñaꞌa‑ia.

⁵⁵Naꞌa‑ia nax n‑jaꞌan‑ia nuu xixitna‑ro Abram xiꞌin nuu daꞌya dana‑te. Nɨkava nɨkuita koo xijan, kuu María, xiaꞌan‑i.

⁵⁶Naxa uni yoo n‑xo tuu María veꞌe Isabel. Ijan dada juan nuꞌu‑ña veꞌe‑ña.

⁵⁷N‑xee kɨu kaku daꞌya Isabel, te n‑xajan‑ña ɨɨn seyɨɨ.

⁵⁸Yo n‑kudɨ ini‑ña. N‑ka teku ñayiu xndaxio yatni xiꞌin‑ña xiꞌin ñayiu ka kuu tnaꞌa‑ña xa yo n‑kundaꞌu ini ñaꞌa Ianyuux, te n‑ka kudɨ ini‑i tuku.

⁵⁹Nu n‑kuu una kɨu seluchi jan, te xndeka ñaꞌa tadɨꞌɨ‑s juaꞌan xa taꞌnde ndodo ñɨɨ nuu ii‑s, te n‑ka juini ñayiu xyuku ijan xa danani‑i‑sɨ Zacarías ná nani taa‑s,

⁶⁰ko xiaꞌan dɨꞌɨ‑s nuu ñayiu jan: —Ñaꞌa, chi Nxua kunani‑i.

⁶¹Te ka xiaꞌan ñayiu jan nuu‑ña: —Ko ñayo ñayiu ka kuu tnaꞌa‑n nani duꞌa.