Iluk 1:29-61

²⁹Wangesomelei, waneng seiw bu em wangse weng be kiliko, yol angeko, ibolow fukunomelu: “Nimtew angom ete e weng be nelo nange ya?”, angsu kale.

³⁰Angui, Sunbin-Got em dabalakamin finik be ulo bokoumomele: “Ku kanelom finganemokolew te! Sunbin-Got e kulo kilele katemeko, ibolow so kekemsomi, folok so kekembe kasike.

³¹Kame ku kilele kilila! Ku aul kumun kesomi, kunum aul mak dukuko, em wiin e Yesus dangolewka!

³²Kunum waneng i elo atemeko, bokolomeliw: ‘Wiin fian so katiw alakabe Sunbin-Got em min ete te!’, angokoliw te. Kamok Fian Sunbin-Got e aul beelo kamok fian kelewei, e akalem awalik kumel emisik kamok fian Debit em alenale atew keboke te.

³³Kebomi, Sekow em muluwel dow Isalal kawtiw biim sunsun boke kamok fian kebomi, ilo diwkuw diwkuw yeteboke te.”, wangse kale.

³⁴Wangei, Malia u yan weng bokolewomelu: “Nono ye? Kunum so binba kebi kasike.”, dangsu kale.

³⁵Dangui, Sunbin-Got em dabalakamin finik be yan weng bokoumomele: “Sunbin-Finik e kom mit telesomelei, wiin so abiil tikin kel alakabe Sunbin-Got em kitil be kamkatigoloke kasike, kunum waneng i Sunbin-Got akalem wiin so amkose kunum beelo atemeko, bokolomeliw: ‘Sunbin-Got em fein min ete kai!’, angokoliw te.

³⁶Kate kame, ku kilele kilila! Kom kalak fasel Elisabet ukati aul kumun kebu te. Sua e, kunum waneng i bokolomeliw: ‘U kumun du kesu kai!’, wangbisiliw kate, u fein aul kumun keko, bului, kame gung kel kayow kele te.

³⁷Feinka! Sunbin-Got em kitil ete fian kasike, e ki keko, mesesem mesesem eisneng alik alik be fein kaneloke te.”, wangse kale.

³⁸Wangei, Malia u yan weng bokolewomelu: “Ne Sunbin-Got em weng afak kel bin waneng kasike, kom nangew weng be fein kanenemoka!”, dangsu kale. Dangui, dabalakamin finik be ulo koumeko, iti unse kale.

³⁹Beli, beem ding dim bakate, Malia u fongate akate uneko, amgu aneng Sudia aneng fian em abiw mutuk mak kawtem elo unsu kale.

⁴⁰Uneko, Sekalaia yemkal im am biliw am elo uneko, Elisabet ulo “Neek a! Belew yako!”, wangsu kale.

⁴¹Wangui, Elisabet um Malia um wangu weng be kilisu ding dim bakate, ukalem aul um kumun tem alakabe be yol angse kale. Angei, Sunbin-Finik akal um mutuk weneko, gekei,

⁴²u weng fian kuw gaaneko, bokoumomelu: “Sunbin-Got em dukembe bamki fian be mali waneng im kulubiliw bamki alik alik be bakiyemkabe te. Kom mutuk be aul bakati bamki fian so kelewbe aul te.

⁴³Ne nono waneng kate, nem Kamok Fian em auk ku nem mit mewso telew a?

⁴⁴Kom weng kilili ding dim bakate, nem mutuk be aul bakati kalfong fian keko, yol ange kembe te.

⁴⁵Feinka! Ku Sunbin-Got em ‘Kaneloki kai!’, angse ibolow fukunin beelo ‘Fein!’, angbelew kasike, e kulo bamki fian so kasikokemboke te.”, wangsu kale.

⁴⁶Wangui, Malia ukati bokolomelu: “Nem ibolow e Kamok Fian em wiin be daolewko,

⁴⁷nem ibolow tem bakati nelo dakanemkabe Sunbin-Got elo kalfong fian kelewkabi te.

⁴⁸Nimtew angom? Nakalem ete sak wiin banim weng afak waneng kebi kate, kame em ding akal, sow em ding akal, diwkuw diwkuw kunum waneng alik alik i Sunbin-Got em kanenemse eisneng be atemeko, bokolomeliw: ‘Feinka! Sunbin-Got e buulo bamki so keumse kai!’, angokoliw kasike.

⁴⁹Feinka! Kitil so auk so Sunbin-Got be nem dulum elo fian eisneng mak kanenem kembe te. Em wiin e wangweng tokotoko so kekabe te.

⁵⁰E akalem weng afak kebiliw kunum waneng so, ikalem muluwel dow so, alik alik biilo diwkuw diwkuw kinkin ibolow keyemboke te.

⁵¹Akalem teing dim ete auk so kitil so eisneng banban kelewse kate, e ikalem wiin ete daowbiliw kunum waneng ilo yenbakalakabe te.

⁵²E wiin so kamok kunum im wiin be de mit da koyem kekabe kate, ibolow felit so kunum waneng im wiin be e daoko, katiw elo da koyemkabe te.

⁵³Yemen tew so biliw kunum waneng ilo ken eisneng yemeneko, ilo gek koyemkabe te. Kate emso kawtiw ilo gel mak yemeninba kesomi, ilo sak yenbakalakabe te.

⁵⁴Akalem ilo yangse kinkin weng be e akokow kelinba kese kasike, akalem weng afak kawtiw Isalael kawtiw ilo fein dakayemkabe te.

⁵⁵Nimtew angom? Sua kel akate, e Abalakam so, akalem muluwel dow iso, alik alik biilo kinkin keyembe weng be duyemse kasike.”, angsu kale.

⁵⁶Keko beli, Malia u alak Elisabet uso ka bului, kayow alemsal mak alei, u iti ukalem abiw dim elo unsu kale.

⁵⁷Beli, Elisabet um aul dukulomin ding dim bakate, u fein kunum aul mak dukusu kale.

⁵⁸Dukului, Elisabet um angin so, ukalem abiw kasel iso, alik alik i kililiwete: “Sunbin-Got e Elisabet ulo kinkin ibolow fian mak keumse kai!”, angeko, uso kalfong fian mak kesiliw kale.

⁵⁹Iti ben kel ding mak banime ding dim bakate, i aul beliw beem kal okilomin talsiliw kale. Teleko, i bokolomeliw: “Aul beem wiin akalem alew wiin taman Sekalaia danguma!”, angsiliw kale.

⁶⁰Kate, auk u bokoyemomelu: “Babo! Em wiin e Sion kasike.”, yangsu kale.

⁶¹Yangui, i bokolomeliw: “Yom angin ikal mak em wiin Sion banim kasike, nimtew angbelew a?”, angeko,