San Lucas 17:12-30

¹²Ya anae jumalom gui un songsong, manasoda güije yan dies na taotao na manategtog; ya manojgue desde y chago.

¹³Ya jajatsa y inagangñija, ya ilegñija: Jesus, Maestro, gaease nu jame.

¹⁴Ya anae jalie, ilegña nu sija: Janao ya infanue y mamale nu jamyo. Ya susede anae manjajanao, manjuyong mangasgas.

¹⁵Ya y uno guiya sija, anae jalie na jomlo güe, jabira güe tate, ya janaagagang mannae si Yuus minalag.

¹⁶Ya jatomba güe papa gui fion adeng si Jesus, ya janae grasias: este na taotao, Samaritano.

¹⁷Ya manope si Jesus, ilegña: Ada ti dies y mangasgas? ya manmangue y nuebe?

¹⁸Taya masoda tumalo mague para unae si Yuus grasias, na esteja y taotao juyong.

¹⁹Ya ilegña bu güiya: Cajulo ya unjanao; y jinengguemo munajomlo jao.

²⁰Ya anae mafaesen ni y Fariseo sija, ngaean nae ufato y raenon Yuus, jaope ilegña: Y raenon Yuus, ti matungo finatoña.

²¹Ni ujaalog: Estagüe! pat ayogüe! sa y raenon Yuus, gaegueja gui sumanjalommiyo.

²²Ya ilegña ni y disipuluña sija: Ufato y jaane sija, na infanmalago na inlie uno gui jaanin y Lajin taotao, ya ti inlie.

²³Ya ujaalog nu jamyo: Estagüe, pat ayogüe; chamiyo tumatitiye, ni indalalaque sija.

²⁴Sa taegüijeja y lamlam, yan mañila gui un lugat gui papa y langet, ya inina y otro banda gui papa y langet; taegüineja locue y Lajin taotao, gui jaaniña.

²⁵Lao nesesita na ufamadese finena megae, ya umarechasa ni este na generasion.

²⁶Sa jaftaemanoja y jaanin Noe, taegüijeja locue y jaanin y Lajin taotao.

²⁷Mañocho, yan manguimen, yan manasagua, yan manafanasagua, asta ayo na jaane anae jumalom si Noe gui atca, ya mato y dilubio ya manyinilang sija todo.

²⁸Taegüineja locue jasusede gui jaanin Lot: mañocho, manguimen, manmamajan, manmanbende, manmananom, yan manmanjatsa guma;

²⁹Lao ayoja na jaane anae jumanao si Lot guiya Sodoma, janauchan guafe, yan asufre guinin y langet, ya manyinilang todo sija.

³⁰Taegüijeja uguaja güije na jaane yanguin ufamanue y Lajin taotao.