Luka 17:12-30

¹²Le nga ipa a ilo be lo pombe ye malala kase atu, ngan di tooltool sangaul atu yo botoboto medana ikan di nga, ngan man titauaraii dada mai. Le nga la tikodo manga mooloo ye kasin,

¹³inbe koodi le mai. Tiyei ne, “Atoo, Yesu! Tool mai, lom pam a kulonam!”

¹⁴Motong la Yesu ikamata di le iwete pang di nen, “Kamulu a kalo, ngan le lo ang tapmim kapatnai tinimim pang di tooltool ke paroranga so pang Maro nga.” Le nga be tipa a timulu a tilo, ngan botoboto kidi tina ngan imapmap le tinidi dook mata mulu.

¹⁵Motong la di tooltool tina ngan atu in ikamata tinini ngan dook mata mulu nga, le nga imulu tak pang ye Yesu a idu, ngan lon ponana le koonoo le mai, inbe iyitmaka Maro ene.

¹⁶Ngan ipa le idu potai ye Yesu, motong igun turunu le du damon toko tana kene punu, inbe iwete lo ponana ki panga. Ngan tool tani in tool ke Samaria.

¹⁷Yesu ikamata le nga iyei ne, “Ai, ayeisa ang tooltool tina yo sangaul nga, ngan la akaratang le imot a tinimim dook mata mulu nga. Bong ngan di diem yo limi be pai nga, ngan tila ngai?

¹⁸Yelei, di tooltool tina ngan sa lono be imulu a iman iyitmaka Maro ene tiap, la le tool ke malala san i, ya taleu imulu a iman be man iyitmaka Maro ene nga?”

¹⁹Motong la Yesu iwete pang tool tani in nen, “Oo, kumadit a kula. Lo medana kiong yo kutaru pau i, in la Maro ikaratong ye a le tinim dook mata mulu i.”

²⁰Ye kene atu ngan di Paresi titoro Yesu nen, “Lal yo Maro itaru be matan kala di tooltool ki ye i, in ole nge lo pombe?” Motong la Yesu iraua betanga kidi nen, “Lal yo Maro itaru be matan kala di tooltool ki ye i, in so ke be kakamata ye matamim a lomim galanga ye, ngan tiap.

²¹Ngan nen le ke be di tooltool tiyei ne, ‘Kakamata! Ya bi e i,’ too tiyei ne, ‘Kakamata! Ya meneng e ni,’ ngan tiap. Awete pang nen, yesoo bong lal yo Maro be matan kala di tooltool ki ye i, in pombe pang yang oo.”

²²Motong la Yesu iwete pang di galiunu nen, “Awete pang nen, pang dama ni ye lal atu yo be pombe in nga, ngan ole lomim be le kakamata Tool Moolmool ke Maro, bong o ke be kakamata tiap.

²³Ngan di tooltool kapala ole tiwete pang nen, ‘Kakamata, tool tani bi e i,’ too tiyei ne, ‘Kakamata, ya meneng e ni.’ Bong ngan kin kalongo betanga kidi a katoo di be.

²⁴Awete nen, yesoo lal yo Tool Moolmool ke Maro be imulu a isi pang tana ye in nga, ngan ole dawa ben kili itai a nunngana ilangaraia lang katene mai i le imot.

²⁵Bong muku ngan ole isolo masngana alunu san, inbe di tooltool yo nookoot tiyepe nga, ngan ole tiwala muridi panga lapau.

²⁶“Ngan dada dook tiap ben yo tiyei ye lal ke Noa nga, ngan gaongo leu la be ole tiyei lapau ye lal yo Tool Moolmool ke Maro be imulu a isi ye i.

²⁷Ye lal ke Noa nga, ngan di tooltool tikan be tiyin, inbe tamoto le garup tikerere, inbe tikap di natudi garup a la tipakere di pang di tamoto kapala, le le ilo ye lal ke Noa yo be iyiri a ilo ookoo lono ye i. Motong la oongoo mai pombe a iraumatamata di tooltool yo tilo ookoo lono tiap nga, ngan a timmata le imot.

²⁸“Inbe ye lal ke Loto nga, ngan di tooltool tiyei urata gaongo nen leu. Di ngan tikan be tiyin, inbe tiyawar so le tiyimi so kidi diedi, inbe tikapki le titu ye renge rumu kidi.

²⁹Bong ye kene yo Loto imadit a iyege Sodom a ila nga, ngan le ei ipa ye pat lutene imol ke lang katene dawa ben ki, a isi le si iraumatamata di tooltool ke Sodom tina a timatamata le imot.

³⁰“Ngan gaongo leu, ye lal yo Tool Moolmool ke Maro be imulu a isi pombe mallangana ye in nga, ngan ole di tooltool tiyei dada nen lapau.