Luke 17:12-30

¹²Ke el oru elan utyak nu in sie siti srisrik, el sun mukul singoul su oasr musen lepa ke manolos. Elos tu yen loes kutu

¹³ac wowoyak ac fahk, “Jesus! Leum! Pakoten nu sesr!”

¹⁴Ke Jesus el liyalos el fahk nu selos, “Fahsrot ac fahk mwet tol uh in liye kowos.” Ke elos srakna fahsr in som, elos nasnasla.

¹⁵Ke sie selos liye lah el nasnasla, el foloko ac kaksakin God ke pusra lulap.

¹⁶El faksufi sisken nien Jesus ac sang kulo nu sel. El sie mwet Samaria.

¹⁷Na Jesus el fahk, “Ya tia mwet singoul pa aknasnasyeyukla ah; na pia eu?

¹⁸Mea pwaye lah mwetsac se inge mukena foloko in sang kulo nu sin God?”

¹⁹Ac Jesus el fahk nu sel, “Tuyak ac som; lulalfongi lom akkeyekomla.”

²⁰Kutu mwet Pharisee siyuk sin Jesus lah Tokosrai lun God uh ac tuku ngac. Ac el topuk, “Tokosrai lun God ac fah tia tuku in ouiya ma ac ku in liyeyuk.

²¹Wangin mwet ac fah fahk, ‘Liye, pa inge!’ ku ‘Pa ingo!’ mweyen Tokosrai lun God oasr na in kowos.”

²²Na el fahk nu sin mwet tumal lutlut, ‘Pacl se ac fah tuku ke kowos ac kena liye sie sin len lun Wen nutin Mwet, a kowos ac tia liye.

²³Ac fah oasr mwet fahk nu suwos, ‘El a ingo!’ ku ‘El a inge!’ Tusruk nimet som sokol.

²⁴Ke pacl se sarom uh sarmelik inkusrao ac tolak acn lucng layen inge nwe layen ingo, ac fah ouinge Wen nutin Mwet ke len lal.

²⁵Tusruktu meet liki ma inge, el ac enenu in akkeokyeyuk ac sisila sin mwet in fwil se inge.

²⁶Oana ma tuh orek ke pacl lal Noah ah, ac fah ouinge pac in len lun Wen nutin Mwet.

²⁷Mwet nukewa tuh mongo na ac nim, ac orek marut nwe ke na len se Noah el sroang nu fin oak soko ah, na sronot uh tuku ac onelosla nukewa.

²⁸Ac fah oana ma orek ke len lal Lot. Mwet uh elos mongo na ac nim, elos moli, elos kuka, elos yok, ac elos musa.

²⁹Ke len se Lot el som liki acn Sodom, e ac sulfur tuh kahkla lucng me ac onelosla nufon.

³⁰Ac fah ouinge len se ma Wen nutin Mwet el ac sikme uh.