San Lucas 12:15-55

¹⁵Junni Jesús ya tsachibe tsantisi, jeralelabe itsantinue: —Aman fécari ticatiya tanla fe pansi itolajochunae tinue. Junto aman tencabe nenalarana! uyanla tanunca natiya munaito quiratuchun.

¹⁶Junni Jesús tsantito, man quiraqueman pato cuenta polarinue micarichun. Itsantinue: —Duque cala tan tsachi jochunae tinue. Aman yachi witabi duque ticatiya serachunae tinue.

¹⁷Junni mancari tenca cato, ¿Niyan queyanan? tichunae. Aman yachi witabi duque cato, ¿Tile duqueyanan? tichunae tinue. Aman tilenantiya duno itoyoe tichunae tinue.

¹⁸Tsanque tenca cato, dunun yaca manharaleno tenca cachunae tinue. Aman dunun yaca araleto, fécari jelelen ya manqueyanaeque tenca cachunae. Aman junbi jerale finoca, jera ticatiya tanunca duto tanae tichunae tinue.

¹⁹Aman junbi ticatiya jera duto, pansi chuanaeque tenca cachunae tinue. Duque wata finoca michi tayoe tichunae tinue. Junto pansi chun, fiesta quin, cuchin, queyanae tichunae tinue.

²⁰Tsantin chusanan Diosi yabe cuenta quito, tenca iton joe tito epe dunae tichunae tinue. Amana quepen puyano joe. Junni nu puyanunbi, ¿jun duranunca tiyan cachunan? tichunae tinue.

²¹Junni Jesús ya cuentaca polaritobi, itsantinue: —In tote calachi oco iminlari jun cuwentanan tenca itonla jochunae tinue Diosichi cale popere tenca jotonan.

²²Junni Jesús yachi tsachilabe itsantinue: —Jun tenchi nulaca itsanque payichinayoe tinue: Nula wepanalaituna! Finoca, o panuca niyaque cano jonunca wepanalaituna! tinue.

²³Niyaque sonnano jonunca tenca canato, anocari tenca canola itoe. O panube seito nenanoca tenca cato nenatuntsan joe.

²⁴Jana pichuca quirato tenca calaquede! tinue. Waquetumin joe. Setumin joe. Dunun ya itoe. Junni tsan josanan Diosi yalachi finoca cuwaniquimin joe tinue. Nulaca mantimini pichulaca fécari laquirato cuidaichunae tinue.

²⁵¿Wepanacachinan quitsa metro fe uwaino podeinola joyun? tinue.

²⁶Junni jun nacátiya quino podeitutori, ¿ti quichun uyanca wepanalainayun? tinue.

²⁷Junsi panucanan wepanatuntsan joe. Aman lulica tenca calaquede! tinue. Yanan seque uwaimin joe. Trabajaquitumin joe. Sita quitumin joe. Tsan jotonan duque uraran joe tinue. Matu to miya Salomón tsara moso panube seitonan, luli tsansi moso itominue tinue.

²⁸Aman lapanan moora yucapiyamin joe. Amana jayacate moso jotonan, nanni ina jequeito ninbi niyamanhe. Junni lapari moora yucapiyamin josanan, Diosi yaca duque moso suwamin joe luli isa carito. Junni Diosi epe lapaca moso suwamin jotori, nulachi sen panucanan cuwachunae tinue. Aman nulari duque moso jochique wepananato, Diosica tennatuchi timin tsanni jolajoe.

²⁹Junni nulari wepanatulajona! tinue. Finoca, o cuchinoca niyaque cano jonunca natiya wepanatulajona! tinue.

³⁰Aman jeralete Diosica tennatuminlari junca cachique wepanaminlae. Aman nulachi Apa Diosi nulaca cuidaimin joto, ticatiya jera munaranunca mirae.

³¹Aman Diosi mantananun tsachi bolonbi pewito nenachun tenfelaina! tinue. Junni tsanque tenca cato nenanari, jera munaranunca Diosi cuwachunae tinue. Jesús tsanque micarinue.

³²Junsi Jesús yachi tsachilabe itsantinue: —Nula narin tsachila jotonan, jeleratulajona! Nulachi Apa Diosi nulaca laquirato, ya mantananun tsachi bolon isa cariyanae ticae tinue.

³³Aman ticatiya tanunca osito, poperelachi lemosi cala cuwalaquina! tinue. In tote tanun cala piyachunae tinue. Junni aman Diosichi tenchi cala cuwatori, ya calaca Diosichica erenun cuwenta jochunae. Junbi yucapiyatuchunae. Junbi ticatiya tanunni jeraituchunae. Nin julunan fituchunae tinue. Nin tarinlanan tarinlaquituchunae tinue. Junni aman in tote layan ticatiya tachique tenfetulajona! tinue. Jamochi ticatiya layan tachique tenfelaina! tinue.

³⁴Nulachi senca man postobi tatori, jun postoca tenca caminla jochunae tinue. Jesús tsanque micarinue.

³⁵Junni Jesús camicarinato, yachi tsachilabe itsantinue: —Lari casalainanun fiesta quirabi jica jun tsachi cuwenta joichunae tinue. Lachi peyunla méranola jochunae yape la manjasa. Junni la manjasi, otiyanae. Junni lachi tenchi tamolanca lasichun méranola jochunae tinue. Aman nula jun tsanquenan meralarana! tinue. Jera seito meralarana! sendori quica jun, lanparin tulica jun cuwenta.

³⁷Aman patron manjanasa, weyan peyunla yaca mérato sonnan chularachunae tinue. Yala duque pansi jolajochunae. La nulabe tsarasica pachinayoe tinue: Patron patsa jun sen peyunlaca chuteto, yanan peyun cuwenta ito yalachi ano poto cuwachunae tinue.

³⁸Wa quepente janari, o quitsa quepente janari, sonnan méranola joe tinue. Sonnan caméraminla duque pansi jolajochunae tinue.

³⁹O tarinlaca tenhilaide! tinue. Ya tsacuminla miitolajoe tarinla niyanque óra janola jonunca. Ya miramanpari, sonnan mérato quirano jominla jonhoe yape tarinquebi wiyalaitusa.

⁴⁰Nula jun tsanquenan tencabe méranola joe la tsachi ica jun joto manpatano jonunca. Laca manpatatuchunae tilatinasanan, manpatano joyoe tinue. Jesús yachi tsachilaca tsanque micarinue.

⁴¹Junni Jesús tsanque micarinunbi, Pedro yabe itsantinue: —Miya, ¿nu chiquilaberi tsantinayun, o piyanlelabenan tsantinayun? tinue.

⁴²Miya Jesuri yabe tulanto itsantinue: —Nulari lachi mayordomola cuwenta jolajoe. Aman ya tsacumin uyanchi jinato, mayordomoca mantachunae peyunlaca cuidaito ano cufisa. Junni aman mayordomori duque tenca tan tsachi jotori, seque cuidaichunae tinue.

⁴³Aman patron manjanasa cuidainatori, pansi jochunae tinue.

⁴⁴La nulabe tsarasica pachinayoe: Ya mayordomoca fécari mantá tan suwachunae yape jera tanunca mantasa.

⁴⁵Mayordomo mantimini seiton jotori, seque cuidaituchunae tinue. Lachi patron manjano wanhinae tito, peyunlaca asota quichunae. Aman jiluito, warente cuchito, winan iniichunae.

⁴⁶Junni ya seiton mayordomo yachi patronca jatuchunaeque tenca canasanan, manjaniichunae tinue. Miitonun órate jato, seiton mayordomoca duque casticaquichunae tinue. Diosica tennatuminlaca casticaquinun cuwenta, ya mayordomocanan casticaquichunae tinue.

⁴⁷Junni nulari tencabe jolajona! tinue. Tsachi mancaca duque mantá tan suwanari, yari duque ticatiya quintsan jochunae. Aman nasiri mantá tan suwanari, nasiri ticatiya quintsan jochunae tinue. Junni aman Diosichi mantaca miraminla jun tsanquenan jolajochunae. Miratonan, Diosichi mantaca merátuminla duque casticailaichunae. Aman miitoto seiton quiminla mantimini nasiri casticailaichunae tinue.

⁴⁹Junto Jesús yalaca camicarinato itsantinue: —Lari duque padeseiichunae tinue. Padeseino fecári duque wepananayoe. Lari tobi ninca serawobi jamin cuwenta joyoe tinue. Nin lunamin cuwenta lachi bolon tsachila seralaichunae tinue. Junni ya ninca we luquinasa tenjanae tinue.

⁵¹¿Nulari laca ti quebi jacae latiyun? tinue. Jeralelaca man parejori tenca casa caribi jatucayoe. Te, la janunbi tsachilari uyan tala, uyan tala tenca calaquichunae tiyoe tinue.

⁵²Inte nechi man yabiri chuminla talanan pa jolajochunae tinue. Manteca jominla, pemanca lachi parte, paluca lachi contra jolajochunae tinue. O paluca lachi parte, pemanca lachi contra jolajochunae tinue.

⁵³Lachi tenchi apabe naolabenan pa tala jolajochunae tinue. Ayanbe namalabenan pa tala jolajochunae. Nasobe unilachi ayanbe pa tala jolajochunae tinue.

⁵⁴Junto Jesuri layan tsachila raminlaca micarinato, yalabe itsantinue: —Nula pelechi poyo raminca quiratori, suwa quichunae timinlae. Junni suwa quimanhe.

⁵⁵O butunni tala nechi wu quinari, loba loba jochunae timinlae tinue. Junni loba loba jomanhe.