Samu 132:2-13

²Baame embapa lao kana minyuo Isaraele wambunya Anatu Porai dokome pii porai leyamo doko suu pyao karape.

³Namba anda paowape luu palenge panda paowape

⁴imambu soo luu palyuo soope pii naro.

⁵Dopa pyuo pao Kamongo karara yuu dokope dee anda Isaraele wambunya Anatu Porai doko palira anda doko maipala dokopa luu palyuo nenge nao kame sero.

⁶Yuu Beteleme dokona Kana Minyuo Lalu Lao Lenge Pii Palenge Bokote doko silyamo dokona leyaminyi siyama. Dee yuu Jirimi dokona siyamo dokona kando nyiyama.

⁷Namwame lao dokopa Kamongona anda dokona mwua leyama. Banya petenge isa silyamodorena kingi wapambupi lakao kyaponga pyao misi lama leyama.

⁸O Kamongo, embena Kana Minyuo Lalu Lao Lenge Pii Palenge Bokote dokona embena porainya renge kongwalu ingyuo palamo doko tembole anda dokona minyuo epo karalu karape.

⁹Embena purisi akali dupwa rolae doko anjuku lao pyuo karenale. Embena wambu dupwa raeko maiyuo pii porakai lenale.

¹⁰Embena kendemande akali Dapitipa pii lalu lao lee kande. Embena rombo palyisi kiŋi doko mata maiyuo kaeya napipi.

¹¹Embame Dapiti kando pii lalu lao lee doko dee range nyii nare ingyara. Pii Dapiti kando leene dupwa nambame embena ikinyingi mende kiŋi wasaronopa emba karenge alo dokona nakama iso karara, lee.

¹²Embena ikinyingi dupwame nambana lalu lao lenge pii doko minyuo karo dee nambana mawa pii maingi dupwa kamba laa narami ramo nakamana ikinyingi dupwa opetayako emba pinginyili pyuo yuu peparae kiŋi ingyuo kararami, lee.

¹³Kamongome yuu Sayone doko rombo palyuo nyepala banya anda dokona pinya letamo.