Sam keil 85:2-10

²Komumon methos onom en komai, meatin keil onom koa memum tisa minuk, korleletei mun vatisa en sakkalkalien keil onomai.

³Tinom rovepengtei mun en komai, kihiles vurohien onom heha ran komai.

⁴Ahi ten mututien onomai, kiling ris komai en vulumai, ka tinom naattei mun komai.

⁵?Ahi, mukave? ?Tinom heat komai lisenges? ?Kitie lat vurohien onom min titamai ka havimai keil?

⁶Kisan ris tahosien min komai li, meatin keil onom, keke mekilea mevamasmasuk.

⁷O Iahova, kitie lati min komai envatien onom koa sakras vavus, ka kutut moulien keil onomai.

⁸Kami meatin keil mihetaengonau. Inau, nilong kat asa koa Iahova koa vi Ahi hehiteni minau. Kei vat kati keke hesan tomat min meatin keil onen. Ka meatin votut keil onen irmumontei mun unounien one.

⁹Anatin eli keke kei sak mesei voutut koakeil avouhou mini. Kei hekataun ir keke toralien onen koa hetetamen imok kilea val en atan oser.

¹⁰Ahi hetie lat envatien onen min meatin keil onen ka keil usil kati lisenges. Keil um hemal en meten, ka kei hesan tomat hel ven keil.