Sam 49:6-20

⁶Murde kxdrka'ngr lcng nzabrtrpzlr drtwrdr mz trau, X nzglqpx-lzbqng mz nzngini-krdr bcnyrng.

⁷A' trpnzngr kxrkrlz nzxpepx-krde nzlu-krde esz'-krde. Murde ncblo trtakitrdeu nzkapx-krde narncbr ngr nzlu-alongr kx yrlq Gct, Kxmule-esz' ka-atwrnr-ngrde trau x dztudeng amrlx. Murde rblx nzxpe-krde da kx na-arlapxle nide mz gq.

¹⁰Leplz amrlx sa nabzng, kxmule-esz' kxnzyrplapxng o kxnzngqngung. X dztudrng amrlx sa nabzszbzlr mz kzdung kz leplz.

¹¹X kxmule-esz' mzli ka nzrnginyzng drtc', A' gq lrdr dela nangipe ma nyzdr mz nzmnc-alope-krdr elr.

¹²Da amrlx kcng tqmatq mz drtwrdr sa nayrkrpx-kzng. Leplz sa nabzng da kc tzwai animol amrlx.

¹³Lrpzki r kxnzngqngung kcng tzabrtrlr drtwrdr mz nidr esz'-krdr x mz dztudrng, Yrkrtxpxpwz mz nzbzngr.

¹⁴Apule kx nzbzngr nide kxetu rdr kc tqmailzle nidr mz gq lrdr, Mz nzapu-krdr sip. X kxnztubqng sa navzneng wq mrkc tzyrtzmqngr namz ngrdr. X mz nzmibi-krdr, nzyc-rlrubzng mz ma nyzdr.

¹⁵A' Gct sa naxpetrle ninge mz zmatq ngr nzbzngr, Mz nzarlapx-krde ninge mz gq.

¹⁶Bzkq nabzmu talvzo mz nzmc-krmu bcnyrng, X nzkqlunepxkr dztudrng.

¹⁷Murde rblx nzrtwzmingr dztung mz nzbzngr. Dztung la tqyc, a' nrkrdrtq la namibi.

¹⁸Kxmule-esz' bcnyrng nzabrtz-zvzng mzli kc tzlube-ngrdr, X nzamatq leplz nidr murde sc tzakqlunepx-zvzlr dztudrng,

¹⁹A' sa navzo-kzng mz gq, da kc tzwai melrmqdrng, Mz nzmnc-alo-krdr mz nzlo.

²⁰Da amrlx kcng tqmatq mz drtwrdr mane x nardr tryrplatrpwzu. Leplz sa nabzng da kc tzwai animol amrlx.