1Jogueroporaei va'e pe Davi ombopara va'ekue, Bate-Seba reve joguerekoague re profeta Natã ou vy ijayvu jave guare (2 Samuel 11.1–12.20). Xeruete, xemboaxy ke ndereko porãa rupi. Opa mba'e py renhomboaxya rupi vy emboguepa ke ajejavyague.
2Xeky'a'o xereko vaia gui, xejoi ke ajejavyague gui.
3Mba'eta xee ma aikuaa ae xereko vaia, xema'endu'a riae aikovy ajejavyague re.
4Nderovai ae ajejavy va'ekue, ndevy anho, ndee rexaa py ajapo mba'emo vai. Ha'e nunga rupi xee aikuaa anhetẽ meme xere ndeayvua, ha'evea rami xembopagaa guive.
5Xee ma teko vai py ma voi aiko'i va'ekue, ha'i xerereko'i guive xere oĩ ae ma ajejavy aguã.
6Ha'e rã ndee ma orepy'a re anhetẽ va'e oĩ va'e rerovy'a va'e, ha'e rami vy xepy'apy py reikuaa uka 'arandua.
7Xeky'a'o ke hissopo rogue py iky'a e'ỹ va'e ju aiko aguã, xejoi ke, yro'y xiĩ va'e gui xiĩ porãve va'e aiko aguã.
8Ejapo ke oporaeia ha'e ovy'aa rã aendu ju aguã rami, xekãgue remou'ũmba rire teĩ avy'a nho aguã.
9Ema'ẽ eme ajejavyague re, emboguepa ke xereko vaia.
10Xeruete, xere emoĩ kuraxõ pyau iky'a e'ỹ va'e, xenhe'ẽ py xembopyau xereitya ve'ỹ aguã rami.
11Xemoxẽ eme nerenonde gui, neĩ xegui eipe'a eme guive Nenhe'ẽ Ky'a E'ỹ.
12Xere emoĩ ju xereraa jepeague re avy'aa. Xenhe'ẽ py xemombaraete ju xekyre'ỹ aguã rami.
13Ha'e ramo 'rãe ambo'e heko vai va'e kuery ndereko re, ha'e ramo ojejavypa va'ekue ojeko rerova 'rã ndevy.
14Xeruete, xereraa jepe ke tuguy amoẽague gui, Xeruete xereraa jepea. Ha'e ramo aporaei reve arovy'a 'rã ndereko porãa.
15Senhor, eipe'a ke xejuru, ha'e ramo rogueroporaei 'rã.
16Mba'eta ndererovy'ai mymba rojuka vy rome'ẽ va'e. Ha'e rami e'ỹ va'e rire xee ame'ẽ ma 'rãgue. Mba'emo roapy reve rome'ẽ va'e guive ndererovy'ai.
17Ndee Oreruete pe rome'ẽ rã rerovy'a va'erã va'e ma orenhe'ẽ py nda'eveia roendua. Orepy'a re rojejou vai ha'e ronhemboaxy ramo ma ndee Oreruete, noremboaxy e'ỹi 'rã.
18Emoingo porã ke Sião pygua kuery remboaxya rupi vy. Emoatyrõ uka ju Jerusalém tetã kora.
19Ha'e rami vy rerovy'a 'rã teko porã rupi ikuai va'e mba'emo ome'ẽ ramo, mba'emo oapy reve ome'ẽ va'e. Ndevygua altar áry ome'ẽ 'rã okuapy vaka ra'y.
