1Jogueroporaei va'e pe Davi ombopara va'ekue. Arõ Senhor ajerovia ete reve. Ha'e ramo xere oikuaa pota vy oendu xereraa jepe aguã re ajapukaia.
2Ha'e rami vy xerenoẽ yvykua py akanhyague gui, yapo hu'ũ rei va'e mbyte ha'aague gui. Ha'e gui xepy omoĩ atã ju itaova áry.
3Ha'e xejuru py omoĩ mboraei pyau Nhanderuete arovy'a aguã. Ha'e nunga heta oendu vy ojererokyje 'rã Senhor renonde, hexe ojerovia 'rã guive.
4Ovy'a ete 'rã Senhor re ojerovia oikovy va'e. Ha'e kuery nda'ikuai 'rã ojee anho rei ojerovia va'e rami, neĩ apu rupi oiko va'e rami guive.
5Senhor Xeruete, heta ete ikuai iporã va'e remoingo va'ekue, orevy rejapo porã aguã re ndepy'aa guive. Ndereve joo ramigua ndoikoi. Ndereko ha'e javi amombe'u ta va'e rire namombe'upai 'rãgue.
6Ndee ndereipotai mymba ajuka vy ame'ẽ ndevy. Neĩ mba'emo apy reve jejavya regua nereme'ẽ ukai. Ha'e rami 'rãgue py reipe'a xeapyxa.
7Ha'e ramo xee aipoa'e: “Apy ma aĩ. Kuaxia re ipara oiny xerekorã regua.
8Ndee reipota va'e xee ajapoxe, Xeruete. Xepy'a re oĩ ndeguigua lei ajapo aguã”, ha'e.
9Heta va'e kuery ijatya py amombe'u ayvu porã teko porã regua. Neĩ peteĩ henda py ma voi namombe'u e'ỹi. Senhor, ndee ma reikuaa.
10Xepy'a py ndaikuaa uka e'ỹi ndeguigua teko porã. Arojapukai anhetẽ rupigua ha'e orereraa jepea reikoa. Ijaty va'e kuery gui namombe'u e'ỹi ndee oremboaxya ha'e ndeguigua anhetẽ va'e.
11Ha'e nunga rupi Senhor, exa uka e'ỹ eme xemboaxya. Xemboaxya rupi riae ke xerereko, ndeguigua anhetẽ va'e rupi guive.
12Mba'eta mbovy e'ỹ ikuai mba'emo vai xejoko rei va'e. Xereko vaia xerupity ma. Heta ete ramo ndaexapai. Xe'a xeakã re ikuai va'e gui voi hetave. Xekuraxõ voi okanhy ma.
13Senhor, xereraa jepe na! Senhor, ejapura ke xerepy aguã.
14Xerekove oipe'axe va'e toxĩmba, oxĩmbaa anho toendu. Ajexavai ramo ovy'a rei va'e kuery oxĩmba reve tojevypa ju guakykue katy.
15Tove “Ha'evea rami! Ha'evea rami!” he'i rive okuapy va'e toxĩmba nda'ijayvu kuaavei vy.
16Ha'e rã ndereka va'e kuery ha'e javi ma tandererovy'a oporaei reve. Rejogueraa jepea oguerovy'a va'e “ Senhor ima'endu'a porãmby toiko!” te'i riae okuapy.
17Ha'e gui xee ma iporiaukue'i, ojexavai rei'i va'e teĩ xere Senhor opena porã. Ndee ma xepytyvõarã ha'e xerepyarã. Xeruete, ndeare eme ke!
