24Dule-nued gwatirnoni-sogele, deyob degisadegu gudii guosulid, ar Bab-Jehová we-dule-bendakoed.
25An sapingwa-danikid-akale, an seredgusadse, an dakdisulid, dule-nuedi nue-dummad-wiledii, e-mimmigan mas-egisdii an dakdisulid.
26Dule-nuedi aimarga ibmar-ukalile, nuedgi yeer-itogedba ukdedaed. E-mimmigan ega ibnuedga gued.
27Ibmar-isganagi be bangu, ibmar-nueganbi be imakdii gue. Ar deyob be imakele, Bab-Dummad bega-yar-ukoye-sogsadgi degisadegu be gudii guoed.
28Ar Bab-Jehová igar-inniki-imakleged yeer dakdaed, dule-eba-nue-nanadiidgi, bangusulid, Bab-Jehová amar-nue-edarbedidaed. Dule-isganamardi, bergumaloed, gwen wagan-nikuosurmalad.
29Dule-nuegan-damaladdi, Bab-Dummad ega yar-ukoye-sogsadgi degisadegu mai gumaloed.
30Dule-nued sunmakdele, nue-binsaed-nikaa sunmakdedaed, Dule-nued sunmakdele, igar-inniki-maidba sunmakdedaed.
31E-Bab-Dummad-igar-maid e-gwagegi sedidaed. A-ulale, isgusurdaed.
32Dule-isgana dule-nued-oburgwega arbakee dule-nued-argadidaed,
33Degi-inigwele, Bab-Jehováʼdi dule-isganaga dule-nued-urmakosulid. Dule-nuedga igar-itolear-sogele, egi isgusye-sogega imakosulid.
34Bab-Jehová-abdakdii be gue, a-sogedba be nanadii gue. Bab-Jehová be-nug-odummogoed, neg-nued begadga-guegala, bega ukoed. Dule-isgana-bergumaloedi, be-sunnad be dakoed.
35An dule-isgana daksad, urwar-sapi-dummad-neg-ganikidyob, na san dummarba imaked.
36Degi-inigwele, we-dulemar emiskwaa bergudoed. We-dulemar bato sulibinne dakledagoed. Be amialile, be dakosurguoed.
37Dule-nuegan-damalad be dake, dulemar igar-maidba-damalad be dake. We-dulemar-nueddamaladga igar-nued ega maid.
38Ar dulemar igar-maidgi-yoledimaladdi, bela burgwemaloed, Dule-sunnasur-damaladdi, bela bergudmaloed.
39Dule-nuegan-damalad-e-bendakleged Bab-Jehováʼgi danikid. Ibagan-suli-suli-itogedgi, Bab-Jehová dule-nuegan-bendakedga gued.
40Bab-Jehová bonigangi dule-nued-bendakoed, ar Bab-Jehováʼgi bensuli-gudii gusad. Bab-Jehová dulemar-isganagi we-dule-onogoed, dulemar-isganagi bendakoed.