24Ilia da dafasea, gebe gudu hame dialumu. Bai Hina Gode da ili wa:legadolesimu.
25Na da waha da:i hamoi dagoi. Na da fifi misi helei. Be na da Hina Gode noga:i dunu afae fisiagai amo hamedafa ba:i. Amola noga:i dunu ea mano ha:i manu hameba:le, edegenanebe hamedafa ba:i.
26Noga:i dunu da eso huluane udigiliwane enoma sagosa. Amola e da enoma liligi bu hi lamusa: hahawane iasisa. Amola ea mano da eno dunuma hahawane dogolegele hamosa.
27Wadela:i hamonanu fisiagale, moloidafa hou hamoma. Amasea, digaga fifi manebe da eso huluane esalalalumu.
28Bai Hina Gode da moloidafa hou amoma asigisa. Amola E da Ea dafawaneyale dawa:be dunu amo hame fisiagasa. E da mae fisili, ili gebewane gaga:lala. Be wadela:i hamosu dunu iligaga fifi manebe dunu da gadili sefasi dagoi ba:mu.
29Moloidafa dunu ilia da osobo bagade nana liligi agoane amo lale, amola amo ganodini, eso huluane fifi lalalumu.
30Noga:idafa dunu ea sia: da bagade dawa:su gala. Amola e da eso huluane moloidafa hou hamonana.
31E da ea Hina Gode Ea malasu sia: ea dogo ganodini dawa:i diala. Amola e da amo malasu nabawane hamonaneawane hamedafa yolesisa.
32Wadela:i hamosu dunu da noga:idafa dunu amo ba:lala. Amola e fane legemusa: logo hogosa.
33Be noga:i dunu da ema ha lai dunu ea gasaga wadela:lesi, amo hamedafa ba:mu. Amola fofada:su ganodini, se dabe hame lamu. Bai Hina Gode da e fisiagamu hamedafa dawa:.
34Hina Gode da dima hobea misunu hou amo ouligimu, amo dafawaneyale dawa:ma, amola Ea hamoma:ne sia:i, amo nabawane hamoma. Amasea, E da dima nodoma:ne, soge dima imunu. Amola, di da wadela:i hamosu dunu gadili sefasi dagoi ba:mu.
35Na da ha afaega, gasa fi wadela:i hamosu dunu dawa:i galu. E da dolo ifa gahe Lebanone sogega hahawane lelebe agoai ba:i.
36Be fa:no na amo baligisa ba:loba, e da amogai hame ba:i. Na da e hogoi be hame ba:i.
37Dilia! Dunu noga:i amo noga:le hogole ba:ma! Ea moloidafa hou noga:le hogoma! Olofole hamosu dunu da egaga fifi ahoanebe ba:mu.
38Be wadela:i hamosu dunu ilia da wadela:lesidafa ba:mu. Amola iligaga fi da halesali dagoi ba:mu.
39Hina Gode da moloidafa dunu ili gaga:sa. Bidi hamosu eso da ilima doaga:sea, E da ili gaga:sa.
40E da ili fidisa amola gaga:sa. Wadela:i hamosu dunu da ili wadela:lesisa:besa:le, E da ili gaga:sa. Bai ilia da ilila: gaga:ma:ne, Ema ahoa.