Salmo 96:1-9

¹Sikiyu is menge etew te tivuuk he kelibutan, kentahi niw te veǥu he kanta is Nengazen!

²Kentahi niw is Nengazen ne deliǥa niw sikandin. Tudtula niw kada andew is mehitenged te kedlibriya zin kenitew.

³Ipetueni niw ziyà te langun he menge etew ziyà te menge nasyun is kegkemekeǥeǥehem din wey is egkein-inuwan he menge vaal zin.

⁴Su mekeǥeǥehem is Nengazen, ne ereg sikandin he edeliǥen. Dait sikandin he edtehuzen lavew te langun he zuma he menge ed-ezapen.

⁵Su is langun he menge ed-ezapen te menge etew ziyà te zuma he menge nasyun, ne menge ledawan he mibeelan dan dà, piru iyan is Nengazen mibaal te langit.

⁶Diyà te kandin is kegkemekeǥeǥehem wey kegkelavew, ne ziyà te valey zin is desen wey kekempet.

⁷Sikiyu is menge etew ziyà te menge nasyun, deliǥa niw is Nengazen. Deliǥa niw is gehem din wey zesen din.

⁸Deliǥa niw is kegkemeǥeǥehem din, ne uwit kew te pemuhat dutun te kedseled niw ziyà te valey zin.

⁹Azap kew kandin diyà te segradu he etuvangan din. Sikiyu is menge etew kayi te tivuuk he kelibutan, medtahud kew kandin diyà te etuvangan din.