Salmo 7:2-11

²su emun kenà a kenikew edlibriyen, ne kela ke edhimetayan e zan; ebpitpitasen dan is lawa ku iring te ebeelan te erimaung te egkezawi zin, ne zutun wazè en ebpekelibri kediey.

³Nengazen he Megbevayè ku, emun nekevaal a te mezaat diyà te iring ku he etew,

⁴emun mibelesan ku te mezaat is meupiya he mibeelan kedì te emiǥu ku, emun mid-eǥawan ku te menge azen is kuntada ku te wazà hustu he hinungdan,

⁵ne vey-ani ad kenikew pinaaǥi te kedtuǥut nu he mezaag a te menge kuntada ku ke edsurungen e zan. Bey-ani ad ke edtekutakan e zan taman te kebpatey ku, ne ed-ewaan e zan is minatey en.

⁶Nengazen he Megbevayè ku, ipeehè nu en guntaan is pauk nu te menge kuntada ku he utew egkengepauk kedì, su iyan man ebpen-ahaan nu is hustu he kukuman.

⁷Tiǥuma nu is langun he menge tribu ziyà te kenikew, ne dumelaha nu sikandan te ziyè ke zà te langit.

⁸Iyan ka, Nengazen, edhukum te menge etew. Ipeehè nu he wazè ku salà, su netuenan nu man he metazeng a ne wazè ku mibeelan he mezaat.

⁹Kenè nu ituǥut he ebpedayun is ulaula te mezaat he menge etew, ne tuvazi is menge metazeng, su metazeng ke man he Megbevayà, wey egkesusi nu is isip dey wey gehinawa zey.

¹⁰Iyan ka, He Megbevayà, nehimu he kelasag ku. Iyan ka edlibri te menge metazeng.

¹¹Egkezumahan te ketazeng is kedhukum nu, ne kada andew egkepeukan nu is menge lalung.