Salmo 78:2-41

²Ebpenuruen ku sikiyu pinaaǥi te menge sempità. Edtudtulen ku keniyu is in-eles he menge ketutuanan dengan

³he netuenan tew en, su midtudtul kenitew te menge kepuun tew.

⁴Kenè tew heini id-eles te menge vatà; edtudtulen tew heini ziyà te edsunud he menge lapis te kevuwazan. Edtudtulan tew sikandan te ǥehem te Nengazen wey te egkengein-inuwan wey zait he edeliǥen he menge vaal zin.

⁵Mibeǥayan din te kesuǥuan is menge etew ziyà te Israel he menge kevuwazan ni Jacob. Ne insuǥù din diyà te menge kepuun tew he ipenurù dan heini ziyà te menge anak dan,

⁶su para metueni heini te ebpekesunud he lapis te kevuwazan, ne igkepenurù dan daan heini ziyà te menge anak dan.

⁷Ne pinaaǥi kayi edsarig sikandan te Megbevayà, ne kenè dan egkelipatan is mibpemeelan din ne edtumanen dan is menge suǥù din.

⁸Ne kenà sikandan egkeiring te menge kepuun dan he menge supekiru, kenà menge metinumanen, kenà melig-en is kedsarig dan te Megbevayà, wey kenè dan mepezumdumahan kandin.

⁹Is menge sundaru he menge kevuwazan ni Efraim, minsan neǥumeenan sikandan te menge panà, nemelaǥuy sikandan dutun te timpu te tebek.

¹⁰Wazè dan tumana is kebpekid-uyun dan te Megbevayà; wazè dan sunuza is kesuǥuan din.

¹¹Midlipatan dan is egkein-inuwan he menge vaal zin he impeehè din kandan.

¹²Egkein-inuwan is mibeelan te Megbevayà diyà te Zoan he sakup te tanà he Ehipto, ne naahà haazà te menge kepuun tew.

¹³Midtevì din is daǥat ne impevayè din sikandan; diyè din isavuk te pesikilizà te nezalandalan he tanà is wahig he henduen be te menge elavat.

¹⁴Emun maandew, egiyahan din sikandan pinaaǥi te ǥapun, ne te mezukilem, ne pinaaǥi te kerayag te hapuy.

¹⁵Impeveka zin is menge vatu ziyà te sibsivayan ne midtudà puun dutun is wahig he henduen be te ziyà ebpuun te serebseb, umbe kenà alang-alang he wahig is imbeǥey zin kandan.

¹⁶Impetudè din puun dutun te vatu is wahig, ne henduen be haazà te ziyà ebpuun te zekelà he wahig he edtudà.

¹⁷Piru is menge kepuun tew, mibpedayun dan mulà he ebaal te salà diyà te kandin. Dutun te sibsivayan midsukulan dan is Utew Lavew he Megbevayà.

¹⁸Midtivevè dan gezami is Megbevayà pinaaǥi te kebuyù dan te ampey zan he keenen.

¹⁹Mid-insultuwan dan is Megbevayà pinaaǥi te kegkaǥi zan te, “Kenè kiw vuwa igkepekaan te Megbevayà kayi te sibsivayan.

²⁰Tutuu iyan he hein midtabpì din sikan is batu ne migawas is wahig, piru egkeveǥayan kiw zin be zaan buwa te supas wey usa is menge etew zin?”

²¹Umbe, nepauk is Nengazen te kegkezineǥa zin kandan. Iring te hapuy is pauk din te menge tig-Israel he menge kevuwazan ni Jacob.

²²Su wazè dan kedtuu kandin, ne wazè dan medsarig he edlibriyen din sikandan.

²³Piru minsan pa te iyan haazà, midsuǥù din is langit he med-abri,

²⁴ne mibpeud-uzanan din sikandan te keenen he egngezanan te ‘manna’. Imbeǥey zin kandan is keenen he ebpuun te langit su wey zan mekaan.

²⁵Sikandan is menge etew zà duen, nekekaan dan te keenen te menge velinsuǥuen. Ne impezahar te Megbevayà heini he keenen diyà te kandan.

²⁶Impepengeramag te Megbevayà te keramag he ebpuun te edsilaan wey edsenlepen pinaaǥi te ǥehem din.

²⁷Ne mibpantad is menge tagbis he impeuzan-uzan din diyà te kandan.

²⁸Impelugtanè din haazà diyà te ebpekeliǥuy te menge tulda zan duen te kampu zan.

²⁹Umbe, nekekaan sikandan ne nengahantey zan, su imbeǥey te Megbevayà kandan is egkesuatan dan.

³⁰Ne zutun te ebpetakè en sikandan egkaan,

³¹nepeukan sikandan te Megbevayà. Mibpenhimetayan din is tig-Israel he menge vetan-en he memeupiya is kedlelawa wey memezesen.

³²Piru minsan pa te neseǥazan dan heini is langun he egkein-inuwan he mibpemeelan te Megbevayà, wazè dan med-engked he ebaal te salà wey wazè dan medtuu kandin.

³³Umbe, migègaanan din tepusa is menge untung dan pinaaǥi te netik-ew he kezeetan.

³⁴Ne hein mibpenhimetayan din is duma kandan, ne is duma zuen te nengesamà, midsendit dan ne midangep dan diyà te kandin ne zekelà is suat dan te tavang din.

³⁵Neisip dan he iyan endilungè dan wey edlibri kandan is Utew Lavew he Megbevayà.

³⁶Piru kenà diyà ebpuun te ǥehinawa zan is kedeliǥa zan kandin su menge teruen sikandan.

³⁷Kenà meheǥet is gehinawa zan diyà te kandin; kenè dan metinumanen te kebpekid-uyun kandan.

³⁸Minsan pa te iyan heini, hihizuwen gihapun kandan is Megbevayà. Mibpesaylu zin sikandan te menge salè dan ne wazè din sikandan dèdeeti. Layun din ed-eǥena is pauk din kandan minsan utew en sikandin egkepauk.

³⁹Midtentenuzan din he menge etew zà sikandan, he iring te keramag he edlavey zà su ebpematey sikandan.

⁴⁰Diyà te sibsivayan, layun dan edsupaka wey ebeǥayi te seeng is Megbevayà.

⁴¹Layun dan egezami is Megbevayà; ebeelan dan is igkeepes te Waǥas he Megbevayà te Israel.