Salmo 71:7-22

⁷Mahabet is nekeiring kedì he ziyà ed-aput te kenikew su ǥeina te neehè dan pinaaǥi te kedlevani nu kedì he iyan ka iyan melig-en he eputà.

⁸Layun ku edeliǥa is kegkemekeǥeǥehem nu.

⁹Kena a kenikew engkezi emun meǥurang ad. Kenà a kenikew pesegdana emun meluya ad.

¹⁰Su midtiǥum is menge kuntada ku su mid-uyun dan mehitenged kediey; egkesuatan e zan te edhimatey.

¹¹Ke sikandan te, “Mibey-anan en sikandin te Megbevayà, umbe edel-asen tew sikandin ne edekepen tew, su wazè en edtavang kandin.”

¹²He Megbevayè ku, kenà a kenikew pekeziyui; kenè ka langanlangan is edtavang kedì.

¹³Berakat he mepeel-elezi wey mengezeeti is menge etew he mibutangbutang kedì. Berakat he mepeel-elezi wey susudia is menge etew he egkesuat he edezaat kedì.

¹⁴Piru siak, Megbevayè ku, layun a ebperateng te tavang nu, ne ibpeiseg ku pa is kedeliǥa ku kenikew.

¹⁵Layun ku edtudtula is metazeng he ebeelan nu he kedlibri te menge etew nu, minsan pa te kenè ku heini egketegkad ke maan.

¹⁶Edhendiyà a te valey nu, Nengazen he MEGBEVAYÀ, ne edeliǥen ku sikew tenged te menge mibeelan nu he nezumahan te zekelà he ǥehem. Iyan dà edtudtulen ku is ketazeng nu.

¹⁷He Megbevayà, puun te vatè e pa, mibpenurù ad kenikew mehitenged te egkein-inuwan he menge vaal nu, ne taman en guntaan is kebpenudtula ku kayi.

¹⁸Ne minsan pa te ebmeǥurang e en su ed-uvanen ad, ne kenà a kenikew pesegdana, Megbevayè ku, zutun te kebpenudtula ku te ǥehem nu wey zesen nu ziyà te huziyan he menge lapis te menge kevuwazan.

¹⁹Is ketazeng nu, Megbevayè ku, kenà egketegkad. Egkein-inuwan is mibpemeelan nu; wazà iyan iring kenikew.

²⁰Minsan ibpesaǥad a kenikew te mahabet he menge elentusen, ne ebeǥayan a ǥihapun kenikew te veǥu he untung; egkeiring a te minatey he ebenhawen nu zed.

²¹Ebeǥayan a kenikew te zekelà he zengeg, ne ed-umanan a kenikew edlipaya.

²²He Megbevayè ku, tenged te kebmetinumanen nu edeliǥen ku sikew pinaaǥi te kedtukar te alpa. Edeliǥen ku sikew, is Waǥas he Megbevayà te Israel, pinaaǥi te kegkanta ku he eduyuǥan te alpa.