Salmo 62:2-9

²Iyan sikandin endilungè ku wey menluluwas ku. Iyan sikandin eputè ku, umbe kenà a egkezeetan.

³Sikiyu is langun he menge kuntada ku, sengemenu keluǥayad is kedtulunga niw kedsurunga kediey te kedezaat kedì? Iring a te verengbeng he egketempag en wey te kudal he midsulad en.

⁴Egkesuatan a keniyu te ebpaawà puun te metikang he ketengdanan ku. Ne igkelipey niw is kedtarùtarù. Meupiya uvag is menge lalag niw kayi te kedì piru ziyà te ǥehinawa niw ebpenrewakan a keniyu.

⁵Diyè ku zà te Megbevayà egkaangken is kebpekehimeley ku su ibpeperateng e zin.

⁶Iyan dà sikandin endilungè ku wey menluluwas ku. Iyan sikandin eputè ku, umbe kenà a egkezeetan.

⁷Iyan is Megbevayà edlibri kedì wey ebeǥey kedì te zengeg. Iyan sikandin melig-en he endilungè ku he edlavan kedì.

⁸Sikiyu is menge etew te Megbevayà, sarig kew kandin te langun he timpu! Keǥiya niw ziyà te kandin is langun he igkeǥiyaǥiya niw su iyan sikandin kelasag tew.

⁹Is menge etew, dungganen man etawa kenà, ne kenà egkeseriǥan. Neked-iring dà he wazà pulus; emun edtimbangen sikandan ne edhuna pa sikandan he mahagkap te keramag.