Salmo 50:4-18

⁴Ed-umawen din is langit wey is kelibutan su ibpepirma zin te kedhukumi zin te menge etew zin.

⁵Egkaǥi sikandin te, “Tiguma niw kayi te kediey is metinumanen he menge etew ku he mibaal te kedpekid-uyun kedì pinaaǥi te kebpemuhat.”

⁶Ebpahayag is langit he metazeng is Megbevayà, su iyan sikandin edhukum.

⁷Migkaǥi pa is Megbevayà te, “Sikiyu is menge etew ku, pemineǥa niw is egkeǥiyen ku. Iyan a Megbevayà, kes Megbevayà he iyan ed-ezapen niw; iyan a ebpenistiǥus te ebpekesuǥat keniyu te menge tig-Israel.

⁸Wazè ku sikiyu zewaya te menge kebpemuhat niw, etawa menge pemuhat he edtutungen he layun niw ibpemuhat.

⁹Piru wazè ku kinehenglana is menge tudu he vaka niw wey menge kambing niw.

¹⁰Su kediey is langun he langgam: is menge langgam diyà te ketelunan, is menge vaka ziyà te linibu he menge vuvungan,

¹¹is menge tagbis diyà te menge vuvungan, wey is menge langgam diyà te vevesukà.

¹²Angin ke egkevitil a, ne kenà a ebuyù te keenen diyà te keniyu, su kediey is tivuuk he kelibutan wey is langun he taǥù din.

¹³Kenè ku man egkeenen is usa zuen te tudu he vaka he ibpemuhat niw, ne kenè ku zaan ed-inumen is lengesa zuen te menge kambing.

¹⁴Siak, is Utew Lavew he Megbevayè niw, iyan egkesuatan ku he ibpemuhat niw kedì is: kebpeselamat wey is kedtumana niw te menge pesarig niw kedì.

¹⁵Umawa a keniyu te timpu te kelised su edlibriyen ku sikiyu, ne zutun edeliǥen a keniyu.”

¹⁶Egkaǥi mulà is Megbevayà diyà te lalung he menge etew te, “Wazè niw ketenged te kegkaǥi zuen te menge suǥù ku wey kebpekid-uyun ku.

¹⁷Egkeepesan niw is menge penurù ku; wazè niw seǥipaa is menge lalag ku.

¹⁸Emun ebpekeehè kew te tekawen ne ebpekid-emiǥu kew kandin, wey ebpekidrerempungen kew zaan te menge mengungumpadi.