Salmo 38:7-22

⁷Ne kenà meupiya is kegezamgezam ku kayi te tivuuk he lawa ku su ed-al-al is peka ku.

⁸Ne utew e en meluya. Ebpekezag-es a tenged te mesakit he egkeǥezam ku.

⁹Nengazen, netuenan nu is langun he penganduy ku he meulii a, wey nezineg nu is kedag-es ku.

¹⁰Ebpekehuyab is kumeng ku; wazè ku en desen, ne kenè e en utew ebpekaahà.

¹¹Midlikayan ad te menge emiǥu ku wey menge zuma ku tenged te zaru ku. Minsan is menge kezuzumahi ku ne mibpekeziyuan e zan en.

¹²Edtuǥesen a te menge etew he egkesuat he edhimatey kedì. Ne sikan is egkesuat he ebpaantus kedì, midhisgutan dan is paaǥi te kedezeeti zan kedì. Tivuuk he andew is kebpelanu zan te kedluib kedì.

¹³Mibpevevengel e zà wey mibpeeemew he henduen be te kena a ebpekezineg wey ebpekekaǥi.

¹⁴Ebpevevengelan ku zà is mezaat he menge pelanu zan ne wazà ad megkaǥi.

¹⁵Su midsarig a kenikew, Nengazen. Iyan ka, Nengazen he Megbevayè ku, iyan ka edtavak te ampù ku.

¹⁶Su mid-ampù a ziyà te kenikew he kenè nu ituǥut he melipey wey mekepahambug is menge kuntada ku tenged te kegkezèdeeti zan kediey.

¹⁷Henduen be te egkezeetan ad, ne kenà egkeengked is ked-antus ku.

¹⁸Idtug-an ku is menge salè ku he nekesamuk kediey.

¹⁹Melig-en wey mahabet is menge kuntada ku. Egkeepesan e zan minsan te wazà hustu he hinungdan.

²⁰Mezaat is ibales dan te menge meupiya he vaal ku kandan. Ne egkuntedahan a zan su ebpeninguhà a he ebaal te meupiya.

²¹Nengazen he Megbevayè ku, kenà a kenikew pesegdana; kenà a kenikew pekeziyui.

²²Tevangi e en guntaan kenikew, Nengazen he menluluwas ku.