Salecebaicne 8:12-23

¹²Aime Filipdi Wapongte ngani-damongte siduc nga Yesu Kristole fungine mime yegengkeme ngic-ngigac sasawadi momoc ngagesingkelu misa lowaibong.

¹³Inguc aibong Saimon ye inguchac Yesu ngagesingkelu misa lowalu Filip emeina gawec. Filipdi pasile maaine nga pasi damuineholec bame Saimon ye yogo nganilu kwatackelu ngage-ngage bole homacne bawec.

¹⁴Samaria ngic-ngigac yenge Wapongte yowa ngage-angac aiibong, yogolec siduc Yerusalem iwa salecebaicne yengela hikeme ngageibong. Ngagelu Pita nga Yoane salecepabong hikeiboc.

¹⁵Esecne yengela Tili Asu monic mi wawec, yenge Sugucne Yesule wacka sugu misa lowaibong. Ilec ailu yeke hikelu yenge Tili Asu baningte Sugucne milockeiboc.

¹⁷Aime salecebaicne yeke molenginecti socnginang loboc yenge Tili Asuholec aiibong.

¹⁸Salecebaicne yeke ngic yengele socka molenginec loboc Tili Asuholec aiibong. Inguc aibong Saimon yogo nganilu moneng yetenale bawelelu

¹⁹yanguc edocepawec, “Ngeke bole-yowa tapiliineholec yogo na momoc neleboc na ingucnehac ngic socnginang molene lobe Tili Asuholec aidaing.”

²⁰Inguc mime Pitadi yanguc edowec, “Wapongti Tili Asu moc gelegac, yogo monengti fuli banogale ngagegic, me? Monenggoneholec ngeke momoc dac-sanangka fedabiyecte!

²¹Wapongti kwelegona kwesacgone nganigacte tapili yago monic mi balu mocbenang gadamecte.

²²Ga sisipilic aibabagone yogo hegilelu kwelegone hefaliyeme Sugucne milockeng kwelegona angac kwesacine hegilecguna.

²³Na nganibe, ngage-ngage sowacnedi ga basowalecgume bikicti muc ingucne hefecgugac.”